'நிதி ஒதுக்கீட்டை நாடாளுமன்ற உறுப்பினருக்கே தர வேண்டுமா?' — அன்வார்

ஆலோர் காஜா — நாடாளுமன்றத் தொகுதிகளுக்கு வழங்கப்படும் அரசாங்க நிதி ஒதுக்கீடு, அத்தொகுதியின் மக்கள் பிரதிநிதியின் தனிப்பட்ட உரிமை அல்ல என்று பிரதமர் டத்தோ ஸ்ரீ அன்வார் இப்ராகிம் வலியுறுத்தினார்.

அந்நிதி மக்களுக்கு வழங்கப்படுவதாகவும், அத்தொகுதி மக்களின் வசதியையும் வாழ்க்கைத் தரத்தையும் உயர்த்தும் பல்வேறு வசதிகளை ஏற்படுத்தவே பயன்படுத்தப்படுவதாகவும் அவர் கூறினார்.

"நிதி ஒதுக்கீடு நாடாளுமன்ற உறுப்பினருக்கே வழங்கப்பட வேண்டும் என்பதில்லை. அது மக்களுக்கு வழங்கப்படுகிறது. எப்போதிலிருந்து நாம் அதை நாடாளுமன்ற உறுப்பினருக்கு வழங்க வேண்டும்? RM2 மில்லியன் ஒதுக்கீடு இருந்தால், அந்த RM2 மில்லியன் மக்களுக்கு, பள்ளிகளுக்கு, மத பள்ளிகளுக்கு, மசூதிகளுக்கு, வடிகால் பழுதுபார்ப்புக்கு… இவை அனைத்தையும் நாங்கள் செய்வோம்," என்றார். (மலாய் மொழியிலிருந்து மொழிபெயர்க்கப்பட்டது)

இக்கொள்கை நீண்ட காலமாக நடைமுறையில் உள்ளதாகவும், நாடாளுமன்ற உறுப்பினர்களுக்கு இது ஏற்கெனவே தெரியும் என்றும் அன்வார் கூறினார்.

"இக்கொள்கை முன்பிருந்தே பொருந்தும், நாடாளுமன்ற உறுப்பினர்களுக்கு இது தெரியும். இப்போது அவர்கள் எதிர்க்கிறார்கள்; அவர்கள் எதிர்க்கும்போது, நாங்கள் நேரடியாக மக்களுக்கே வழங்குகிறோம்," என்று ஆலோர் காஜாவில் உள்ள அர்-ரஷிடின் மசூதியில் வெள்ளிக்கிழமைத் தொழுகைக்குப் பின் செய்தியாளர்களிடம் அவர் கூறினார்.

பிரதமர் துறை அமைச்சர் (மத விவகாரங்கள்) செனட்டர் டாக்டர் சுல்கிஃப்லி ஹாசன் மற்றும் மலாக்கா காவல்துறைத் தலைவர் டத்தோ சுல்கைரி முக்தார் ஆகியோரும் உடனிருந்தனர்.

தங்களுக்கான நிதி ஒதுக்கீடு அரசாங்கத்தால் தடுக்கப்பட்டதாக சில நாடாளுமன்ற உறுப்பினர்கள் கூறியதற்குப் பதிலளிக்கும் வகையில் பிரதமர் இதைத் தெரிவித்தார்.

நுருல் இஸ்ஸா 'கட்சியில் தொடர்ந்து செயல்படுகிறார்'

PKR துணைத் தலைவர் பதவியை விடுவிக்குமாறு நுருல் இஸ்ஸா அன்வார் நேற்று விடுத்த கோரிக்கை குறித்துக் கேட்டபோது, அவர் தற்காலிகமாக வேறு பணிகளில் கவனம் செலுத்த வேண்டியுள்ளது என்று அன்வார் கூறினார்.

"அவருக்கு வெளியே சிறிது காலம் ஒரு சிறப்புத் திட்டம் உள்ளது; எனவே நான் பரவாயில்லை என்றேன், அதை நாம் ஏற்றுக்கொள்ளலாம்… ஆனால் அவர் இன்னும் கட்சியில் செயல்படுகிறார்," என்றார்.

— பர்னாமா