போதைப்பொருள் வழக்கில் இந்தோனேசியாவில் மேலும் ஒரு மலேசியர் கைது

சுராபாயா – மெத்தாம்பெட்டமீன் மற்றும் எக்ஸ்டசி மாத்திரைகளைக் கடத்த முயன்றதாகச் சந்தேகிக்கப்படும் மற்றொரு மலேசியரை இந்தோனேசிய அதிகாரிகள் சில நாள்களுக்குள் கைது செய்துள்ளனர். இக்குற்றத்துக்கு அந்நாட்டில் மரண தண்டனை விதிக்கப்படலாம்.

DI என்று மட்டுமே அடையாளம் காணப்பட்ட 22 வயது ஆடவர், கோலாலம்பூரிலிருந்து விமானத்தில் வந்திறங்கியதும் திங்கட்கிழமை இந்தோனேசியாவின் இரண்டாவது பெரிய நகரான சுராபாயாவில் கைது செய்யப்பட்டதாக விமான நிலைய பாதுகாப்புப் பணிக்குழுத் தலைவர் நோவி மனுங்கல் அறிக்கையில் தெரிவித்தார்.

தகவலின் அடிப்படையில் நடவடிக்கை எடுத்த அதிகாரிகள், சந்தேக நபரின் உடலில் ஒட்டப்பட்டிருந்த மெத்தாம்பெட்டமீனையும் எக்ஸ்டசி மாத்திரைகளையும் கண்டுபிடித்தனர் என்று அறிக்கை கூறியது.

990 கிராம் மெத்தாம்பெட்டமீன் அடங்கிய நான்கு பொட்டலங்களும், 1,089 எக்ஸ்டசி மாத்திரைகள் அடங்கிய நான்கு பொட்டலங்களும் கைப்பற்றப்பட்டதாக நோவி கூறினார்.

ஐந்து கிராமுக்கு மேல் போதைப்பொருள் கடத்தியதாக அவர் மீது குற்றம் சாட்டப்பட்டுள்ளது. இந்தோனேசியாவில் இதற்கு மரண தண்டனை விதிக்கப்படலாம்.

கடந்த வாரம், ஜகார்த்தாவின் சுகர்னோ-ஹட்டா சர்வதேச விமான நிலையத்தில் 39 வயது மலேசிய விமானியின் பயணப் பையில் 70,000-க்கும் மேற்பட்ட எக்ஸ்டசி மாத்திரைகள் கண்டுபிடிக்கப்பட்டதையடுத்து அவரும் கைது செய்யப்பட்டார்.

அவர் மலேசியாவிலிருந்து பயணிகள் விமானத்தை இயக்கி வந்திருந்தார்; பின்னர் நடத்தப்பட்ட பரிசோதனையில் பல வகை தடைசெய்யப்பட்ட போதைப்பொருள்கள் அவரது உடலில் இருந்தது உறுதியானது. – ஏஎஃப்பி