அம்பாங் தொகுதி ஒருங்கிணைப்பாளராக பிரதமரின் அரசியல் செயலாளர்

பிரதமரின் அரசியல் செயலாளர் அஸ்மான் அபிடின், அம்பாங் தொகுதி மக்களுக்கு உதவிகளும் நலன்புரி சேவைகளும் மேலும் ஒழுங்காக, திறமையாக, பயனுள்ள வகையில் வழங்கப்படுவதை உறுதி செய்ய 'அம்பாங் நாடாளுமன்றத் தொகுதி ஒருங்கிணைப்பாளர்' என்ற பொறுப்பை பிரதமர் அன்வார் இப்ராஹிமிடமிருந்து பெற்றுள்ளதாகக் கூறினார்.

அரசாங்கத்தின் ஒவ்வொரு முன்முயற்சியும் மக்களைச் சென்றடைவதை உறுதிப்படுத்த, பிரதமர் துறையின் அமலாக்க ஒருங்கிணைப்பு பிரிவு (ICU) மற்றும் தொடர்புடைய அரசாங்க முகமைகளுடன் இணைந்து செயல்படுவேன் என்று அவர் தெரிவித்தார்.

"இந்த உதவிகளை வழங்கும் பணி, அம்பாங் தொகுதிக்குள் உள்ள மாநில சட்டமன்ற உறுப்பினர்கள், சமூகத் தலைவர்கள் மற்றும் தொடர்புடைய தரப்புகளுடன் நெருக்கமாக ஒருங்கிணைக்கப்படும்.

"எனவே, அம்பாங் தொகுதியில் மக்கள் நலன் சார்ந்த எந்த உதவி விண்ணப்பமும் பிரதமரின் அரசியல் செயலாளர் அலுவலகத்திற்கு நேரடியாக சமர்ப்பிக்கப்படலாம்," என அவர் ஓர் அறிக்கையில் கூறினார். (மலாய் மொழியிலிருந்து மொழிபெயர்க்கப்பட்டது)

MyKHAS முறைமை குறித்த முறைப்பாடு

இதற்கு முன், அம்பாங் நாடாளுமன்ற உறுப்பினரும் PKR உறுப்பினருமான ரோட்ஸியா இஸ்மாயில், தமது தொகுதிக்கு ஜூலை 29 முதல் MyKHAS முறைமையை அணுகும் வழி தடுக்கப்பட்டுள்ளதாக முறைப்பாடு செய்திருந்தார்.

மூத்த குடிமக்கள், மாற்றுத்திறனாளிகள், நாள்பட்ட நோயாளிகள் மற்றும் மக்கள் நேசத் திட்டத்தின் (PMR) கீழ் உள்ள உள்ளூர் நிறுவனங்கள் உட்பட, பாதிப்புக்குள்ளானவர்களுக்கு உதவும் தொகுதி நிதி நிர்வாகத்தை இது பாதிக்கிறது என்று அவர் கூறினார்.

தாம் இன்னும் PKR உறுப்பினராகவும், ஒற்றுமை அரசாங்கக் கொள்கைகளை ஆதரிக்கும் அணியில் ஒருவராகவும் இருப்பதாகவும், 28 ஆண்டு சேவையில் ஒருபோதும் கட்சியை எதிர்த்ததில்லை என்றும் அவர் வலியுறுத்தினார்.

எனினும், MyKHAS முறைமை அணுகல் குறித்த குற்றச்சாட்டு தொடர்பாக அஸ்மான் கருத்து தெரிவிக்கவில்லை.

முன்னர் நிகழ்ந்த வழக்குகள்

இதற்கு முன், பெட்டாலிங் ஜெயா நாடாளுமன்ற உறுப்பினர் லீ சியான் சுங் மற்றும் சுபாங் நாடாளுமன்ற உறுப்பினர் வோங் சென் ஆகியோரும் myKHAS முறைமை வழியாக தொகுதி நிதியை அணுகும் வசதியை இழந்ததாகக் கூறியிருந்தனர்.

இந்தத் தடை தொகுதி நிதி மற்றும் PMR தொடர்பான பணிகளைப் பாதித்ததாகக் கூறிய லீ, அதற்கு அரசியல் காரணங்கள் உள்ளதா என்று கேள்வி எழுப்பினார்.

ஆனால் அன்வார் அந்தக் குற்றச்சாட்டை மறுத்து, நிதி நேரடியாக சமூகங்களுக்கும் வளர்ச்சித் திட்டங்களுக்கும் வழங்கப்படுகிறது என வலியுறுத்தினார்.