SHAKAM: நாட்டு அணிக்கு ரிம1.1 மில்லியன் பரிசு

செப்பாங் – 2026 கிளாஸ்கோ காமன்வெல்த் விளையாட்டுப் போட்டியில் இலக்கை மிஞ்சிய சாதனையுடன் திரும்பிய மலேசிய அணிக்கு, மலேசிய விளையாட்டு வீரர்கள் வெற்றிப் பரிசுத் திட்டத்தின் (SHAKAM) கீழ் மொத்தம் ரிம1.1 மில்லியன் வழங்கப்படும்.

நாட்டுக்குப் பதக்கம் ஈட்டித் தந்த வீரர்களுக்கான அங்கீகாரமாக இப்பரிசு வழங்கப்படுவதாக இளையோர் மற்றும் விளையாட்டு அமைச்சர் டாக்டர் முகம்மட் தௌபிக் ஜொஹாரி தெரிவித்தார்.

தங்கப் பதக்கம் வென்ற ஒவ்வொருவருக்கும் ரிம80,000 வழங்கப்படும் என்றும், போட்டிச் சாதனையை முறியடித்தவர்களுக்கு கூடுதலாக ரிம10,000 போனஸ் உண்டு என்றும் அவர் கூறினார்.

"SHAKAM திட்டத்தில் பதக்க நிறத்துக்கு ஏற்பப் பரிசு வழங்கப்படுகிறது; தங்கத்துக்கு ரிம80,000, போட்டிச் சாதனையை முறியடித்தால் கூடுதலாக ரிம10,000.

"வெள்ளிப் பதக்கத்துக்கு ரிம40,000, வெண்கலப் பதக்கத்துக்கு ரிம20,000," என்று அவர் இன்று கோலாலம்பூர் சர்வதேச விமான நிலையத்தில் (KLIA) அணியை வரவேற்கும்போது கூறினார். (மலாய் மொழியிலிருந்து மொழிபெயர்க்கப்பட்டது)

பரிசுத் தொகை உயர்வு ஆய்வில்

SHAKAM பரிசுத் தொகையை எதிர்காலத்தில் உயர்த்தும் யோசனையையும் அரசாங்கம் ஆராய்ந்து வருவதாக தௌபிக் கூறினார்.

"தேசிய விளையாட்டு மன்ற (MSN) மட்டத்தில் SHAKAM தொகையை உயர்த்தும் யோசனை குறித்து விவாதித்து வருகிறோம். அதற்கு அரசாங்கம் மட்டுமின்றி கூட்டுத்தாபனத் துறையின் ஆதரவும் தேவை," என்றார்.

"மொத்தத்தில், கிளாஸ்கோவில் எட்டுத் தங்கம், மூன்று வெள்ளி, ஐந்து வெண்கலம் ஈட்டித் தந்த வீரர்களுக்கு ரிம1.1 மில்லியன் வழங்கப்படும்," என்று அவர் கூறினார்.