போலி கடவுச்சீட்டு கும்பல் முடக்கம்: மூன்று இந்தோனேசியர் கைது

பெட்டாலிங் ஜெயா – பயண ஆவணங்களைப் போலியாகத் தயாரித்த கும்பல் ஒன்றை குடிநுழைவுத் துறை முடக்கியுள்ளது. இங்குள்ள தாமான் ஸ்ரீ குச்சிங் மற்றும் தாமான் புக்கிட் செராஸ் பகுதிகளில் நேற்று நடத்தப்பட்ட சிறப்பு நடவடிக்கையில், முக்கிய சூத்திரதாரி எனக் கருதப்படுபவர் உட்பட மூன்று இந்தோனேசியர் கைது செய்யப்பட்டனர்.

இரவு 11 மணியளவில் தொடங்கிய இந்தச் சோதனை, புத்ராஜெயா குடிநுழைவுத் தலைமையகத்தின் உளவுத்துறை மற்றும் சிறப்பு நடவடிக்கைப் பிரிவு அதிகாரிகளால் நடத்தப்பட்டது. ஒரு மாத கால உளவுத் தகவல் சேகரிப்பும் பொதுமக்கள் அளித்த தகவலும் இதற்கு அடிப்படையாக இருந்தன.

குடிநுழைவுத் துறை தலைமை இயக்குநர் டத்தோ ஜக்காரியா ஷாபான் கூறுகையில், கும்பலின் முக்கிய சூத்திரதாரி எனக் கருதப்படும் இந்தோனேசிய ஆடவர் ஒருவர், மேலும் அதே நாட்டைச் சேர்ந்த ஓர் ஆடவரும் ஒரு பெண்ணும் கைது செய்யப்பட்டனர் என்றார்.

"முதற்கட்ட ஆய்வில், சூத்திரதாரி கட்டுமானத் துறைக்கான தற்காலிக வேலை வருகை அனுமதிச் சீட்டு (PLKS) வைத்திருந்தது தெரிந்தது. மற்ற இருவர் அனுமதிக் காலத்தை மீறி தங்கியிருந்தனர்," என அவர் இன்று அறிக்கையில் தெரிவித்தார்.

சோதனையில் போலி எனக் கருதப்படும் 119 கடவுச்சீட்டுகள் கைப்பற்றப்பட்டன. இதில் 85 இந்தோனேசிய, 22 மியான்மார், ஏழு பங்களாதேஷ், இரண்டு வியட்நாம், இரண்டு இந்திய மற்றும் ஒரு நேபாள கடவுச்சீட்டு அடங்கும்.

"ஓர் அச்சு இயந்திரம், சில கைபேசிகள் மற்றும் கும்பலின் செயல்பாட்டின் வருவாய் எனக் கருதப்படும் ரிம500 உட்பட ரிம1,500 பணமும் கைப்பற்றப்பட்டது," என்றார்.

கிள்ளான் பள்ளத்தாக்கில் வெளிநாட்டுத் தொழிலாளர் மருத்துவப் பரிசோதனையில் (FOMEMA) தோல்வியடைந்த அல்லது "தகுதியற்றவர்" எனக் குறிக்கப்பட்ட வெளிநாட்டவர்களுக்கு இந்தக் கும்பல் சேவை வழங்கியது என ஜக்காரியா கூறினார்.

"சுகாதாரப் பரிசோதனையின்போது பயன்படுத்தும் வகையில் கடவுச்சீட்டுகள் மாற்றப்பட்டன. ஒரு கடவுச்சீட்டுக்கு ரிம80 முதல் ரிம130 வரை கட்டணம் வசூலிக்கப்பட்டது," என்றார்.

இதே செயல்முறையைப் பயன்படுத்திய கும்பல் தொடர்பாக இது ஐந்தாவது கைது நடவடிக்கை என்றும், இந்த ஆண்டின் தொடக்கத்திலிருந்து இது இயங்கி வந்ததாக நம்பப்படுகிறது என்றும் அவர் கூறினார்.

முக்கிய சூத்திரதாரி 1959/63 குடிநுழைவுச் சட்டத்தின் பிரிவு 12(1)(f) கீழ், மற்ற இரு சந்தேக நபர்கள் அதே சட்டத்தின் பிரிவு 6(1)(c) கீழ் விசாரிக்கப்படுகின்றனர்.