கள்ளப் பாஸ்போர்ட் கும்பல் முடக்கம்: மூன்று இந்தோனேசியர்கள் கைது

பெட்டாலிங் ஜெயா – பயண ஆவணங்களைப் போலியாகத் தயாரிக்கும் கும்பல் ஒன்றை குடிவரவுத் துறை முடக்கியுள்ளது. நேற்று இங்குள்ள தாமான் ஸ்ரீ குச்சிங் மற்றும் தாமான் புக்கிட் செராஸ் பகுதிகளில் நடத்தப்பட்ட சிறப்பு நடவடிக்கையில், கும்பலின் முக்கிய சூத்திரதாரி எனக் கருதப்படுபவர் உட்பட மூன்று இந்தோனேசியப் பிரஜைகள் கைது செய்யப்பட்டனர்.

இரவு சுமார் 11 மணியளவில் தொடங்கிய இச்சோதனை, புத்ராஜெயா குடிவரவுத் தலைமையகத்தின் உளவுத்துறை மற்றும் சிறப்பு நடவடிக்கைப் பிரிவு அதிகாரிகளால் நடத்தப்பட்டது. ஒரு மாத கால உளவுத் தகவல் மற்றும் பொதுமக்கள் அளித்த தகவலின் அடிப்படையில் இது மேற்கொள்ளப்பட்டது.

குடிவரவுத் துறை தலைமை இயக்குநர் டத்தோ ஜக்காரியா ஷாபான் கூறுகையில், கும்பலின் முக்கிய சூத்திரதாரி எனக் கருதப்படும் இந்தோனேசிய ஆடவர் ஒருவர், மேலும் அதே நாட்டைச் சேர்ந்த ஓர் ஆடவர் மற்றும் ஒரு பெண் ஆகியோர் கைது செய்யப்பட்டனர் என்றார்.

"முதற்கட்ட சோதனையில், சூத்திரதாரி கட்டுமானத் துறைக்கான தற்காலிக வேலை வருகை அனுமதிச் சீட்டு (PLKS) வைத்திருந்தது தெரியவந்தது. மற்ற இருவர் காலம் கடந்தும் தங்கியிருந்தனர்," என்று அவர் இன்று ஓர் அறிக்கையில் தெரிவித்தார்.

119 பாஸ்போர்ட்கள் கைப்பற்றல்

போலியானதாகக் கருதப்படும் 119 பாஸ்போர்ட்கள் கைப்பற்றப்பட்டன. இதில் 85 இந்தோனேசிய, 22 மியன்மார், ஏழு பங்களாதேஷ், இரண்டு வியட்நாம், இரண்டு இந்திய மற்றும் ஒரு நேபாள பாஸ்போர்ட் அடங்கும்.

"ஓர் அச்சு இயந்திரம், சில கைபேசிகள் மற்றும் கும்பலின் செயல்பாட்டின் வருவாய் எனக் கருதப்படும் RM1,500 பணமும் கைப்பற்றப்பட்டது," என்றார்.

கிள்ளான் பள்ளத்தாக்கில் வெளிநாட்டுத் தொழிலாளர் மருத்துவப் பரிசோதனையில் (FOMEMA) தோல்வியடைந்த அல்லது தகுதியற்றவர்களாக அறிவிக்கப்பட்ட வெளிநாட்டவருக்கு இக்கும்பல் சேவை வழங்கியது என ஜக்காரியா கூறினார்.

"மருத்துவப் பரிசோதனையின்போது பயன்படுத்த ஏற்ப பாஸ்போர்ட்கள் திருத்தப்படும். ஒரு பாஸ்போர்ட்டுக்கு RM80 முதல் RM130 வரை கட்டணம் வசூலிக்கப்பட்டது," என்றார்.

ஐந்தாவது வழக்கு

இதே செயல்முறையைப் பயன்படுத்தும் கும்பல் தொடர்பான ஐந்தாவது கைது இது என்றும், இந்த ஆண்டு தொடக்கத்திலிருந்து இது இயங்கி வருவதாகக் கருதப்படுகிறது என்றும் அவர் கூறினார்.

சூத்திரதாரி 1959/63 குடிவரவுச் சட்டத்தின் பிரிவு 12(1)(f) கீழ், மற்ற இரு சந்தேக நபர்கள் அதே சட்டத்தின் பிரிவு 6(1)(c) கீழ் விசாரிக்கப்படுகின்றனர்.