ஜொகூரில் ரிம10.68 மில்லியன் மதிப்பு 'பியூ-பியூ' வேப் போதைக் கும்பல் முடக்கம்; ஏழு பேர் கைது

ஜொகூர் பாரு – போதைப்பொருள் கலந்த வேப் திரவம் ('பியூ-பியூ' வேப்) நிரப்பும், பொதி செய்யும் கிடங்காக ஒரு காண்டோமினியத்தைப் பயன்படுத்திய கும்பலின் உத்தி அம்பலமானது. கடந்த ஞாயிற்றுக்கிழமை மாநிலம் முழுவதும் நடத்தப்பட்ட ஐந்து சோதனைகளில் ஏழு பேர் கைது செய்யப்பட்டு, மொத்தம் ரிம10.8 மில்லியன் மதிப்புள்ள போதைப்பொருள் மற்றும் சொத்துகள் கைப்பற்றப்பட்டன.

காலை 11 மணிக்குத் தொடங்கிய இந்த நடவடிக்கை, ஜொகூர் போதைப்பொருள் குற்றப் புலனாய்வுத் துறையால் (JSJN) குலாய், ஜொகூர் பாரு, இஸ்கந்தர் புத்திரி மற்றும் முவார் பகுதிகளில் நடத்தப்பட்டது. இந்தக் கும்பல் கடந்த பிப்ரவரி முதல் இயங்கி வந்ததாக நம்பப்படுகிறது.

ஜொகூர் துணைப் போலிஸ் தலைவர், துணை ஆணையர் ஹூ சுவான் ஹுவாட் கூறுகையில், 36 முதல் 46 வயதுக்குட்பட்ட ஐந்து உள்ளூர் ஆண்கள், ஒரு வெளிநாட்டு ஆண் மற்றும் ஒரு வெளிநாட்டுப் பெண் கைது செய்யப்பட்டனர்.

குலாய் R&R ஓய்வு நிலையத்தில் உள்ள எரிபொருள் நிலையத்தில் நடத்தப்பட்ட முதல் சோதனையில் ஒரு உள்ளூர் ஆணும் ஒரு வெளிநாட்டுப் பெண்ணும் கைது செய்யப்பட்டனர். ஹோண்டா BR-V காரில் மெத்தாம்பெட்டமின் திரவம் அடங்கியிருக்கக்கூடும் என ஐயப்படும் 9,000 வேப் கார்ட்ரிட்ஜ்கள் — 82.40 கிலோகிராம், ரிம4.12 மில்லியன் மதிப்பு — கண்டெடுக்கப்பட்டன.

இஸ்கந்தர் புத்திரி, பந்தார் மெடினியில் உள்ள ஒரு காண்டோமினியத்தில் நடத்தப்பட்ட இரண்டாவது சோதனையில், 127.55 லிட்டர் மெத்தாம்பெட்டமின் திரவம், 0.41 கிலோ எடையுள்ள இரு கொக்கெய்ன் பொதிகள், 40 கிராம் கெட்டமின் மற்றும் பல்வேறு பதப்படுத்தும் இயந்திரங்கள், உபகரணங்கள் கைப்பற்றப்பட்டன.

தாமான் சுத்திரா உத்தாமாவில் நடந்த மூன்றாவது சோதனையில் ஒரு உள்ளூர் ஆண் கைதாகி, ஹெராயின், எரிமின் 5 மாத்திரைகள், எக்ஸ்டசி மாத்திரைகள் கைப்பற்றப்பட்டன. முத்தியாரா ரினி மற்றும் முவார் தஞ்சோங் ஆகாஸில் நடந்த மேலும் இரு சோதனைகளில், கும்பலில் முக்கிய பங்கு வகித்ததாக நம்பப்படும் மூன்று உள்ளூர் ஆண்கள் கைது செய்யப்பட்டனர்.

"விசாரணையில், முதல் சந்தேக நபர் கடத்துபவராக, இரண்டாவது நபர் அவரது மனைவியாக, மூன்றாவது நபர் வேப் திரவ கிடங்கைப் பராமரிப்பவராக, நான்காவது நபர் ரன்னராக, ஐந்தாவது நபர் உபகரணப் பொதிகளைப் பெறுபவராக, ஆறாவது நபர் நடவடிக்கைகளுக்கு உதவியவராக, ஏழாவது நபர் முக்கிய சூத்திரதாரியாக இருந்ததாக நம்பப்படுகிறது," என்று அவர் ஜொகூர் போலிஸ் தலைமையகத்தில் நடந்த செய்தியாளர் சந்திப்பில் தெரிவித்தார். (மலாய் மொழியிலிருந்து மொழிபெயர்க்கப்பட்டது)

மொத்தம் 210.43 கிலோ போதைப்பொருள், ரிம10.68 மில்லியன் சந்தை மதிப்புடையது எனவும், சந்தைக்குச் சென்றிருந்தால் சுமார் 649,096 போதைப் பயனாளர்களைப் பாதித்திருக்கும் எனவும் அவர் கூறினார். சிறுநீர்ப் பரிசோதனையில் இருவருக்கு மெத்தாம்பெட்டமின் நேர்மறையாக இருந்தது; மேலும் நான்கு பேருக்கு குற்றம் மற்றும் போதைப்பொருள் தொடர்பான முன் பதிவுகள் உள்ளன.

1988 ஆபத்தான போதைப்பொருள் (சொத்து பறிமுதல்) சட்டத்தின் கீழ் ஃபோர்ட் ரேஞ்சர், மெர்சிடிஸ்-பென்ஸ் மற்றும் பெரோடுவா அருஸ் என ரிம120,000 மதிப்புள்ள மூன்று வாகனங்களும் பறிமுதல் செய்யப்பட்டன.

அனைத்து சந்தேக நபர்களும் ஆகஸ்ட் 3 முதல் 9 வரை ஏழு நாட்கள் காவலில் வைக்கப்பட்டுள்ளனர். 1952 ஆபத்தான போதைப்பொருள் சட்டத்தின் பிரிவு 39B கீழ் வழக்கு விசாரிக்கப்படுகிறது.