அமெரிக்க புதிய வரிகளால் 7.4 பில்லியன் அமெரிக்க டாலர் ஏற்றுமதி பாதிப்பு: சிங்கப்பூர்

அமெரிக்காவின் புதிய வரிகளால் சிங்கப்பூரின் 7.4 பில்லியன் அமெரிக்க டாலர் மதிப்புள்ள ஏற்றுமதி பாதிக்கப்படுகிறது என்று கான் புதன்கிழமை நாடாளுமன்றத்தில் தெரிவித்தார்.

1974 அமெரிக்க வர்த்தகச் சட்டத்தின் பிரிவு 301-இன் கீழ் விதிக்கப்பட்ட இந்த வரிகள், ஒளியியல் கருவிகள் மற்றும் இரசாயனப் பொருட்கள் உள்ளிட்ட சிங்கப்பூரின் மொத்த ஏற்றுமதியில் ஏறத்தாழ மூன்றில் ஒரு பங்கைப் பாதிக்கும் என்று அவர் கூறினார்.

விலக்கு அளிக்கப்பட்ட ஏற்றுமதிப் பொருட்களில் எரிசக்தி மற்றும் எரிசக்திப் பொருட்கள், சில மின்னணு மற்றும் விண்வெளிப் பொருட்கள், அரைக்கடத்திகள் மற்றும் மருந்துப் பொருட்கள் அடங்கும்.

கட்டாய உழைப்பால் உற்பத்தி செய்யப்பட்ட பொருட்களை இறக்குமதி செய்வதைத் தடைசெய்யும் சட்டம் சிங்கப்பூரில் இல்லை என்பதும், அத்தகைய சட்டத்தை அறிமுகப்படுத்த உறுதியளிக்கும் பரஸ்பர வர்த்தக ஒப்பந்தம் அமெரிக்காவுடன் இல்லை என்பதும் வரி விதிப்பிற்கான காரணமாக அமெரிக்கா கூறியது என்று கான் தெரிவித்தார்.

"முக்கியமாக, ஏற்கெனவே அத்தகைய தடைகளைக் கொண்டுள்ள நாடுகள் உட்பட 60 பொருளாதாரங்களில் எதுவும் இந்த வரியிலிருந்து முழு விலக்குப் பெறவில்லை," என்று அவர் கூறினார். ஐரோப்பிய ஒன்றியம் மற்றும் சீனா உள்ளிட்ட, இதே போன்ற வரி விதிக்கப்பட்ட வர்த்தக பங்காளிகளைக் குறிப்பிட்டு அவர் இதைச் சொன்னார். (மொழிபெயர்ப்பு)

கட்டாய உழைப்புடன் தொடர்புடைய பொருட்களின் வர்த்தகத்தில் தான் ஈடுபட்டதற்கு எந்த ஆதாரமும் இல்லை என்று சிங்கப்பூர் கூறியுள்ளது.

அமெரிக்காவுடனான ஒப்பந்தத்தில் என்ன அடங்கும் என்பதை "கவனமாகப் பரிசீலிக்க" வேண்டியிருக்கும் என்றும், அது "இறக்குமதித் தடையைத் தாண்டிய உறுதிமொழிகள், மூன்றாம் நாடுகள் தொடர்பான ஏற்றுமதிக் கட்டுப்பாடுகள் உட்பட" இருக்கக்கூடும் என்றும் அவர் கூறினார்.

முக்கிய வர்த்தக மையமாக, நாட்டின் பொருட்கள் மற்றும் சேவை வர்த்தகம் ஆண்டுக்கு சுமார் 2.5 டிரில்லியன் சிங்கப்பூர் டாலராக உள்ளது; இதில் 1.4 டிரில்லியன் பொருட்கள் வர்த்தகம். எனவே எந்த இறக்குமதித் தடையும் "கணிசமான தாக்கங்களை" ஏற்படுத்தும் என்று அவர் கூறினார்.

USTR புள்ளிவிவரங்களின்படி, 2025-இல் சிங்கப்பூருடனான அமெரிக்காவின் வர்த்தக உபரி 3.6 பில்லியன் அமெரிக்க டாலராக இருந்தது.