சிலாங்கூரில் 34 டிகிரி வெப்பம்; ஆனால் வறட்சி நிலை இல்லை என அறிவிப்பு

ஷா ஆலம் – சூப்பர் எல்-நினோ நிகழ்வின் தாக்கத்தால் சிலாங்கூரில் வெப்பநிலை 34 டிகிரி செல்சியஸ் வரை உயர்ந்துள்ளது. எனினும், இது இதுவரை வறட்சி அச்சுறுத்தலையோ நீர் வழங்கல் நெருக்கடியையோ ஏற்படுத்தவில்லை.

சிலாங்கூர் உள்கட்டமைப்பு மற்றும் விவசாயக் குழுத் தலைவர் டத்தோ இஸாம் ஹாஷிம், மலேசிய வானிலை ஆய்வுத் துறையின் (MetMalaysia) கணிப்பின்படி இந்நிலை அடுத்த ஆண்டு மார்ச் மாதம் வரை நீடிக்கும் என்று கூறினார்.

சமீப நாட்களில் அசாதாரண வெப்பம் நிலவினாலும், மாநிலத்தின் முக்கிய அணைகளின் நீர்மட்டம் கட்டுப்பாட்டில் இருப்பதாக அவர் தெரிவித்தார்.

"தற்போது சிலாங்கூரில் நிலவும் வெப்பம் வறட்சி நிலையை எட்டவில்லை. வெளிப்புற செயல்பாடுகளைக் குறைத்து, அதிக நீர் அருந்துமாறு மக்களுக்கு அறிவுறுத்துகிறேன்.

"இது வெப்பத் தாக்கத்தில் இருந்து தங்களைக் காத்துக்கொள்ள உதவும். சிலாங்கூர் மக்கள் பொறுமையுடன் இந்த வானிலையை எதிர்கொள்வார்கள் என நம்புகிறேன்," என்று அவர் இன்று சிலாங்கூர் மாநிலச் சட்டமன்ற வளாகத்தில் செய்தியாளர்களிடம் கூறினார். (மலாய் மொழியிலிருந்து மொழிபெயர்க்கப்பட்டது)

மேக விதைப்பு இப்போதைக்குத் தேவையில்லை

மாநில அரசு மேக விதைப்புக்கு விண்ணப்பிக்குமா என்ற கேள்விக்கு, தற்போதைய வானிலை வறட்சிக் கட்டத்தை எட்டாததால் அந்த நடவடிக்கை இப்போது தேவையில்லை என இஸாம் பதிலளித்தார்.

எனினும், இந்த ஆண்டின் முதல் ஆறு மாதங்களில் மழைப்பொழிவு கடந்த ஆண்டின் அதே காலத்தை விடக் குறைந்துள்ளதை அவர் ஒப்புக்கொண்டார்.

"கடந்த ஆண்டு ஜனவரி முதல் ஜூன் வரை மழைப்பொழிவு 1,000 மில்லிமீட்டரை எட்டியது. ஆனால் இந்த ஆண்டு அது 1,000 மி.மீ.யை எட்டவில்லை.

"இருப்பினும், இந்த ஆண்டு இறுதியில் மழைப்பொழிவு அதிகரிக்கும் என எதிர்பார்க்கிறோம். தற்போதைய வானிலையைக் கணிப்பது கடினம்," என்றார்.

அணைகளின் நீர்மட்டம் கட்டுப்பாட்டில் இருப்பதாகவும், மாநில நீர் வழங்கலுக்கு அழுத்தம் ஏற்படவில்லை என்றும் இஸாம் மீண்டும் வலியுறுத்தினார்.

சிலாங்கூரில் சில நாட்களாக நிலவும் கடும் வெப்பம் மக்களிடையே கவலையை ஏற்படுத்தத் தொடங்கியுள்ளதாக Kosmo! நேற்று செய்தி வெளியிட்டிருந்தது.