22ஆவது சுக்மா: 61 தங்கம் இலக்கு, சாம்பியன் பட்டத்தை மீட்க துறங்கானு முனைப்பு

கோலா துறங்கானு – ஆகஸ்ட் 15ஆம் தேதி சிலாங்கூரில் தொடங்கும் 22ஆவது மலேசிய விளையாட்டுப் போட்டியில் (சுக்மா) 61 தங்கப் பதக்கங்களைக் குறிவைத்து, ஒட்டுமொத்த சாம்பியன் பட்டத்தை மீண்டும் கைப்பற்ற துறங்கானு அணி முனைப்புக் காட்டுகிறது.

துறங்கானு மந்திரி பெசார் டத்தோ ஸ்ரீ டாக்டர் அஹ்மட் சம்சூரி மொக்தார், வீரர்களின் செயல்திறன் மற்றும் துறங்கானு மாநில விளையாட்டுக் கழகம் (MSNT) கடந்த இரு ஆண்டுகளாக மேற்கொண்ட நுணுக்கமான தயாரிப்புகளின் அடிப்படையில் இந்த இலக்கை அடைய முடியும் என நம்பிக்கை தெரிவித்தார்.

சைக்கிள் ஓட்டம் உள்ளிட்ட சில விளையாட்டுகள் மாநில அணிக்கு முதன்மையான தங்கப் பதக்க ஆதாரமாக இருக்கும் என அவர் கூறினார்.

"2024ஆம் ஆண்டு சரவாக்கில் நடைபெற்ற 21ஆவது சுக்மாவில், 41 தங்கம், 36 வெள்ளி மற்றும் 47 வெண்கலத்துடன் துறங்கானு ஐந்தாம் இடத்தில் மட்டுமே இருந்தது.

"அந்த முடிவு வீரர்கள் எழுச்சி பெற்று சிறந்த பலனைப் பெறுவதற்கான உத்வேகமாக இருக்க வேண்டும்," என்று மாநிலச் செயலாளர் டத்தோ மொஹ்ட் அஸ்மி மொஹமட் டஹாம் வாசித்த உரையில் அவர் கூறினார்.

60 முதல் 65 தங்கப் பதக்கங்கள் வரை பெற முடியும் என அஹ்மட் சம்சூரி நம்பிக்கை தெரிவித்தார். போட்டியில் இடம்பெறும் 37 விளையாட்டுகளில் 35இல் துறங்கானு பங்கேற்கும்.

ஊக்கத் தொகை

ஒவ்வொரு தங்கப் பதக்கத்திற்கும் RM3,500, வெள்ளிக்கு RM2,500, வெண்கலத்திற்கு RM1,500 ஊக்கத் தொகை மாநில அரசு வழங்கும் என அவர் தெரிவித்தார்.

"செப்டம்பர் 5 முதல் 10ஆம் தேதி வரை சிலாங்கூரில் நடைபெறும் பாரா சுக்மா வீரர்களுக்கும் இதே ஊக்கத் தொகை வழங்கப்படும்," என்றார்.