கோலாலம்பூர்–ஃபூ குவோக் நேரடி விமானச் சேவையைத் தொடங்கும் Sun PhuQuoc Airways

கோலாலம்பூர்: கோலாலம்பூருக்கும் வியட்நாமின் ஃபூ குவோக் தீவுக்கும் இடையே புதிய தினசரி நேரடி விமானச் சேவையைத் தொடங்குவதாக Sun PhuQuoc Airways அறிவித்துள்ளது. இதன் மூலம் தென்கிழக்காசியாவில் அதன் விமான வலையமைப்பு விரிவடைவதோடு, மலேசியா–வியட்நாம் சுற்றுலா உறவும் வலுப்பெறும்.

2026 செப்டம்பர் 1 முதல் இயக்கப்படும் இப்புதிய பாதையில் நாளொன்றுக்கு ஒரு இரு வழி விமானம் இயக்கப்படும். இதனால் மலேசியா, நிறுவனத்தின் நேரடி வலையமைப்பில் ஏழாவது சர்வதேச சேவை இடமாகிறது.

வியட்நாமின் "முத்துத் தீவு" என அறியப்படும் ஃபூ குவோக் தீவுக்கு மலேசியர்கள் எளிதாகச் செல்ல இச்சேவை வழிவகுக்கும். அத்துடன், தென்கிழக்காசியாவின் முதன்மைச் சுற்றுலா இடங்களில் ஒன்றாக அத்தீவு வளர்வதற்கும் ஆதரவளிக்கும்.

சுமார் 1 மணி 35 நிமிட பயண நேரத்தில், அழகிய கடற்கரைகள், பலதரப்பட்ட உள்ளூர் உணவு வகைகள் மற்றும் உலகத் தரம் வாய்ந்த ஈர்ப்புகளை பயணிகள் அனுபவிக்க முடியும். Sun Group சூழலில் உயர்தர விருந்தோம்பல், பொழுதுபோக்கு வசதிகளும் உள்ளன.

முதல் விமான நேரம்

2026 செப்டம்பர் 1 அன்று முதல் விமானம் ஃபூ குவோக் சர்வதேச விமான நிலையத்தில் இருந்து மதியம் 1.45 மணிக்குப் புறப்பட்டு, கோலாலம்பூர் சர்வதேச விமான நிலையத்தை (KLIA) மாலை 4.20 மணிக்கு அடையும். திரும்பும் விமானம் கோலாலம்பூரில் இருந்து மாலை 5.20 மணிக்குப் புறப்பட்டு, ஃபூ குவோக்கை மாலை 5.55 மணிக்கு அடையும். அனைத்து நேரங்களும் உள்ளூர் நேரம்.

'Resort in the Sky'

நிறுவனம் தனிச்சிறப்பான "Resort in the Sky" எனும் கருத்தாக்கத்தை உருவாக்கி வருகிறது; சேவைகளைப் படிப்படியாக சர்வதேச ஐந்து நட்சத்திர தரத்திற்கு உயர்த்தி வருகிறது.

Sun Group ஹோட்டல்களில் செக்-இன் வசதி, Sun Executive Lounge அனுமதி, நவீன வடிவமைப்புடன் புதிய தலைமுறை கேபின், La Festa Phu Quoc, Curio Collection by Hilton-ஆல் ஈர்க்கப்பட்ட La Festa நறுமணம் ஆகியவை வழங்கப்படும். விமானத்தில் கம்பியில்லா பொழுதுபோக்கு அமைப்பு, வியட்நாம், ஆசிய, ஐரோப்பிய உணவுகள், TWG Tea மற்றும் Delingo காபி ஆகியவையும் உண்டு.

சிறப்புக் கட்டணம்

தொடக்கத்தைக் கொண்டாட, ஒரு வழிக் கட்டணம் RM370 முதல் வழங்கப்படுகிறது. அதிகாரப்பூர்வ இணையதளம் அல்லது செயலி வழி முன்பதிவு செய்பவர்களுக்கு அனைத்து வகுப்புகளின் அடிப்படைக் கட்டணத்தில் 20 விழுக்காடு தள்ளுபடி உண்டு (உச்ச பயணக் காலம் தவிர). கட்டணத்தில் வகுப்புக்கேற்ப உணவு, 23 கிலோ வரை பதிவுப் பயணப்பெட்டி அடங்கும்; குழந்தைகளுக்கு வயது வந்தோர் கட்டணத்தில் 75 விழுக்காடு.

Sun Signature விசுவாசத் திட்டம் வழி புள்ளிகளைச் சேர்த்து மீட்கவும் முடியும். உயர்நிலை உறுப்பினர்கள் National Citizen Commercial Joint Stock Bank (NCB) ஒத்துழைப்பில் வெளியிடப்பட்ட இணை-முத்திரை Visa அட்டை வழி உலகளாவிய கட்டண வசதியைப் பெறுவர்.

2026-ல் வடகிழக்காசியா, இந்தியா, ரஷ்யா, மத்திய ஆசியாவுக்குப் புதிய பாதைகளைத் தொடங்கவும், ஆண்டு இறுதிக்குள் 32 விமானங்களாக விமானத் தொகுப்பை உயர்த்தவும் நிறுவனம் இலக்கு வைத்துள்ளது. – UTUSAN