விமானி போதைக்கடத்தல்: லோக்கை குற்றம் சாட்டுவது ஏன்? எம்.பி. கேள்வி

போதைப்பொருள் கடத்தல் குற்றச்சாட்டில் மலேசிய விமானி ஒருவர் கைது செய்யப்பட்ட விவகாரத்தில், போக்குவரத்து அமைச்சர் அந்தோனி லோக் ஏன் குற்றம் சாட்டப்பட வேண்டும் என பாங்கி நாடாளுமன்ற உறுப்பினர் சியாஹ்ரெட்ஸான் ஜோஹான் கேள்வி எழுப்பியுள்ளார்.

எம்சிஏ இளைஞர் பிரிவின் துணைத் தலைவர் மைக் சோங் வெளியிட்ட அறிக்கை "தரம் தாழ்ந்தது" என்று கூறிய அவர், ஜசெக செயலாளர் நாயகமான லோக் மீது பழி சுமத்த இந்த விவகாரத்தை அவர் பயன்படுத்திக் கொள்வது வெளிப்படையானது என்றார்.

"ஒரு விமானி போதைப்பொருள் கடத்தலில் பிடிபடும்போது, லோக் விளக்கம் அளிக்க வேண்டும் என ஏன் வலியுறுத்தப்படுகிறது? பெரிய கேள்வி என்னவென்றால், அந்த விமானி நமது பாதுகாப்புச் சோதனைகளை எப்படிக் கடந்தார் என்பதுதான்," என அவர் முகநூல் பதிவில் தெரிவித்தார்.

"இது ஒரு தீவிர பாதுகாப்பு மீறல் என்பது நம் அனைவருக்கும் தெரியும். ஆனால் லோக் பாதுகாப்புப் பொறுப்பில் இல்லை. அவர் எல்லைகளைக் கட்டுப்படுத்துவதில்லை. ஆனால் இந்த எம்சிஏ நபர் லோக்கைத் தாக்க இந்த விவகாரத்தைப் பயன்படுத்துகிறார்.

"இத்தகைய தீவிர விவகாரத்தை எம்சிஏ பயன்படுத்தக் கூடாது. இது (சோங்) மிகவும் தரம் தாழ்ந்தவராகவும், ஆழமற்றவராகவும் காட்டுகிறது," என்றார்.

கடந்த வாரம், சுமார் 25 கிலோ எக்ஸ்டசி மாத்திரைகள் மற்றும் 2.7 கிராம் மெத்தாம்பெட்டமின் கடத்திய குற்றச்சாட்டில் மலேசிய விமானி ஒருவர் இந்தோனேசியாவின் ஜகார்த்தா சுகர்னோ-ஹட்டா விமான நிலையத்தில் கைது செய்யப்பட்டார்.

ஜகார்த்தாவுக்குப் புறப்படும் முன் அந்த விமானி கே.எல்.ஐ.ஏ.வில் வழக்கமான பாதுகாப்புச் சோதனை நடைமுறைகளைக் கடந்துவிட்டதாக மலேசிய எல்லைக் கட்டுப்பாடு மற்றும் பாதுகாப்பு முகமை உறுதிப்படுத்தியது.

இன்று முன்னதாக, விவகாரத்தைத் தட்டிக்கழிக்க வேண்டாம் என லோக்கை வலியுறுத்திய சோங், அனைத்து விமானப் பணியாளர்கள் மீதான "கண்காணிப்பு வழிமுறைகளின்" செயல்திறனை போக்குவரத்து அமைச்சு கவனிக்க வேண்டும் என சினார் ஹரியான் மேற்கோளிட்டுக் கூறியது.

தற்போதைய சோதனை நடைமுறைகள் போதுமானதா என்றும் அவர் கேள்வி எழுப்பினார்.