தஞ்சோங் ஹரப்பான்: சிலாங்கூரின் மீன்பிடி சுற்றுலா மையமாக முன்னிலை

கிள்ளான் – கிள்ளான் துறைமுகத்தில் உள்ள தஞ்சோங் ஹரப்பான் கடற்கரை, மீன்பிடி சுற்றுலா மையமாக தொடர்ந்து முன்னிலைப்படுத்தப்படுகிறது. இதன் ஒரு பகுதியாக இந்த ஞாயிற்றுக்கிழமை நடைபெறும் சிலாங்கூர் சர்ஃப்காஸ்டிங் சேலஞ்ச் 2026 போட்டியில் மொத்தம் RM17,400 பண பரிசு வழங்கப்படுகிறது.

கிள்ளான் அரச நகர மன்றம் (MBDK), Kail Kota Events உடன் இணைந்து, மலேசிய சுற்றுலா ஊக்குவிப்பு வாரியத்தின் (Tourism Malaysia) ஆதரவுடன் ஏற்பாடு செய்யும் இப்போட்டி காலை 8.30 மணி முதல் பகல் 12.30 மணி வரை நடைபெறும்.

MBDK மன்ற உறுப்பினர் லீ ஃபூ ஹாவ், இரண்டாவது ஆண்டாக நடைபெறும் இப்போட்டி, தஞ்சோங் ஹரப்பானை பொழுதுபோக்கு மற்றும் மீன்பிடி அடிப்படையிலான சுற்றுலா தலமாக அறிமுகப்படுத்த சிறந்த தளமாக அமைகிறது என்றார்.

அந்த இடத்தில் மலாக்கா நீரிணையின் அழகிய காட்சி, மேம்பட்டு வரும் பொது வசதிகள் உள்ளன; பல்வேறு மீன் வகைகள் கிடைக்கும் மீன்பிடி பகுதியாகவும் அது பெயர் பெற்றுள்ளது என்று அவர் கூறினார்.

"தஞ்சோங் ஹரப்பான் மீன்பிடி மையமாகவும் சமூக பொழுதுபோக்கு மையமாகவும் பெரும் ஆற்றல் கொண்டது. இந்நிகழ்ச்சி சுற்றுலாவையும் உள்ளூர் தொழில்முனைவோரின் பொருளாதாரத்தையும் உயர்த்தும்," என்றார் (மொழிபெயர்க்கப்பட்ட மேற்கோள்).

அந்த கடலோரப் பகுதி செனாங்கின், மாயோங், செமிலாங், தெபால் பிபி, கெலாமா, தாலாங், துரி மற்றும் கெதுக்கா போன்ற மீன் வகைகளின் இயற்கை வாழ்விடமாக உள்ளது என்று அவர் மேலும் கூறினார்.

சென்ற ஆண்டு போட்டியில் பகாங், பேக்கானைச் சேர்ந்த ரோஸ்தாம் இப்ராகிம் (50), உயிருள்ள இறாலைத் தூண்டிலாகப் பயன்படுத்தி 2.285 கிலோகிராம் எடையுள்ள செனாங்கின் மீனைப் பிடித்து சாம்பியன் ஆனது, சிலாங்கூரின் சிறந்த சர்ஃப்காஸ்டிங் இடங்களில் ஒன்றாக தஞ்சோங் ஹரப்பான் இருப்பதை நிரூபிக்கிறது என்றார்.

பரிசுகள் மற்றும் பங்கேற்பு

இம்முறை சாம்பியனுக்கு RM7,000, இரண்டாம் இடத்திற்கு RM1,000, மூன்றாம் இடத்திற்கு RM500, நான்காம் இடத்திற்கு RM300 வழங்கப்படும். ஐந்தாம் இடம் முதல் 90வது இடம் வரை வெற்றி பெறுபவர்களுக்கு தலா RM100 கிடைக்கும்.

கிள்ளான் அரச நகர மன்ற மேயர் டத்தோ ஹாஜி அப்துல் ஹமீட் ஹுசைன் நிறைவு விழாவில் கலந்துகொண்டு பரிசுகளை வழங்குவார் என எதிர்பார்க்கப்படுகிறது.

பங்கேற்புக் கட்டணம் ஒரு தூண்டில் கோலுக்கு (இரு கொக்கிகள்) RM70. முதல் 200 பங்கேற்பாளர்களுக்கு இலவச பிரத்யேக டி-சர்ட் வழங்கப்படும்; குலுக்கல் பரிசுகளை வெல்லும் வாய்ப்பும் உண்டு.

முன்பதிவு ஆகஸ்ட் 8 அன்று பிற்பகல் 3 மணி முதல் இரவு 7 மணி வரை, மற்றும் ஆகஸ்ட் 9 அன்று காலை 6.30 மணி முதல் 10 மணி வரை ஏற்பாட்டாளர் கூடாரத்தில் தொடரும்.

மேல் விவரங்களுக்கு 013-266 7011, 017-680 5934 அல்லது 012-284 6811 எண்களைத் தொடர்பு கொள்ளலாம்.