வேகனேஸ்வரன் இன்னும் பணியில் இல்லை: மலேசிய தரைப்படை மறுப்பு

கோலாலம்பூர் – முன்னாள் அங்கத்தவர் சார்ஜன்ட் கே. வேகனேஸ்வரன், மேல்முறையீட்டு நீதிமன்றத் தீர்ப்பைத் தொடர்ந்து தாம் இன்னும் பணியிலுள்ள வீரர் என சமூக ஊடகங்களில் பரவலாகக் கூறியதை மலேசிய தரைப்படை (TDM) மறுத்துள்ளது.

இன்று வெளியிட்ட அதிகாரபூர்வ அறிக்கையில், ஜூலை 23 அன்று TikTok வீடியோ வழியாக வேகனேஸ்வரன் முன்வைத்த கூற்றுகள் ஆதாரமற்றவை என தரைப்படை தெரிவித்தது.

2023 மே 25 தேதியிட்ட மேல்முறையீட்டு நீதிமன்றத் தீர்ப்பு, நடைமுறைச் சிக்கல் காரணமாக முந்தைய பணிநீக்க நடவடிக்கையை மட்டுமே ரத்து செய்தது என்று அது கூறியது.

எனினும், கெப்பாலா பத்தாஸ் மருத்துவமனையின் நோயியல் துறையால் உறுதிப்படுத்தப்பட்ட பரிசோதனையில் மெத்தாம்பெட்டமின் மற்றும் ஆம்பெட்டமின் போதைப்பொருள் இருப்பது கண்டறியப்பட்டதைத் தொடர்ந்து வழங்கப்பட்ட ஒழுங்குநடவடிக்கைத் தீர்ப்பை அது ரத்து செய்யவில்லை.

"அத்தீர்ப்பைத் தொடர்ந்து, 18 ஆண்டுகள் முழுநேரப் பணிக்காலத்தை நிறைவு செய்த நிலையில், நிரந்தரப் படைப் பணி விதிமுறைகள் 2013-இன் கீழ் அவரது பணி நிறுத்தப்பட்டது.

"நிலுவைச் சம்பளம், படிகள் மற்றும் உரிய சலுகைகள் அனைத்தும் எவ்வித ஆட்சேபனையும் இன்றி வழங்கப்பட்டு பெறப்பட்டுள்ளன," என அறிக்கை கூறியது.

MyTentera அட்டை வைத்திருப்பதால் அவர் இன்னும் படை அங்கத்தவர் என்ற கூற்று குறித்து, ஒருவரின் நிலை சட்டம் மற்றும் பணிப் பதிவேடுகளால் தீர்மானிக்கப்படுகிறதே தவிர, அட்டை வைத்திருப்பதால் அல்ல என தரைப்படை விளக்கியது.

பணிநீக்க ஆவணப் பணிகளை அவர் இன்னும் நிறைவு செய்யாததால் அந்த அட்டை அவரிடமே உள்ளது எனவும் கூறப்பட்டது.

"பணி நிறுத்தப்பட்ட எந்த முன்னாள் அங்கத்தவரும் தன்னைத் தரைப்படை வீரராகக் காட்டிக்கொள்ள உரிமையில்லை.

"MyTentera அட்டையைப் பயன்படுத்துவது அல்லது ராணுவ சீருடை அணிவது தண்டனைச் சட்டத்தின் கீழ் குற்றமாகக் கருதப்படலாம்," என்று அது எச்சரித்தது.

நீதிமன்றத் தீர்ப்புகளை எப்போதும் மதிப்பதாகவும், சட்டங்களுக்கு ஏற்பவே நடவடிக்கை எடுப்பதாகவும் தரைப்படை தெரிவித்தது. குழப்பத்தை ஏற்படுத்தும் தவறான தகவல்களைப் பரப்ப வேண்டாம் என பொதுமக்களுக்கு அறிவுறுத்தப்பட்டது.