'இனி எச்சரிக்கை இல்லை': குடிநுழைவுத் துறை இயக்குநர் தவறிழைக்கும் அதிகாரிகளுக்கு எச்சரிக்கை

புத்ராஜெயா, ஆக 7 — ஊழல் மற்றும் அதிகார துஷ்பிரயோகம் உள்ளிட்ட தவறான நடத்தையில் ஈடுபடும் எந்த அதிகாரியையும் அல்லது பணியாளரையும் மலேசியக் குடிநுழைவுத் துறை பாதுகாக்காது எனவும், அவர்கள் மீது உடனடியாக கடும் நடவடிக்கை எடுக்கப்படும் எனவும் அறிவிக்கப்பட்டுள்ளது.

குடிநுழைவுத் துறை இயக்குநர் ஜெனரல் டத்தோ ஜக்காரியா ஷாபான், இந்த நிலைப்பாடு துறையின் நேர்மையை வலுப்படுத்தும் முயற்சிகளுக்கு இணங்கியது எனவும், ஒவ்வொரு அதிகாரியும் தமக்கு அளிக்கப்பட்ட பொறுப்பை முழு தொழில்முறையுடன் நிறைவேற்ற வேண்டும் எனவும் கூறினார்.

'ஃபிளையிங் பாஸ்போர்ட்', 'கவுன்டர் செட்டிங்' மற்றும் தற்காலிக வேலை வருகை அனுமதிச் சீட்டு (PLKS) முறைகேடாக அங்கீகரிக்கப்படுதல் ஆகிய செயல்களில் சில பணியாளர்கள் கூட்டுச் சேர்ந்திருப்பதாக தகவல்கள் தொடர்ந்து கிடைப்பதாக அவர் கூறினார்.

"நான் பலமுறை எச்சரிக்கை விடுத்துள்ளேன், ஆனால் இனி எச்சரிக்கை இல்லை. இனி எச்சரிக்கையும் இல்லை, நினைவூட்டலும் இல்லை. நாங்கள் உடனடி நடவடிக்கை எடுப்போம்," என்று இன்று நடைபெற்ற துறையின் மாதாந்திரக் கூட்டத்தில் அவர் உரையாற்றினார்.

PLKS விண்ணப்ப மற்றும் அங்கீகார நடைமுறையுடன் தொடர்புடைய மலேசியக் குடிநுழைவு அமைப்பு (MyIMMs) ஊடுருவல் வழக்கில் தமது அதிகாரிகள் ஈடுபட்டிருப்பது குறித்த ஆரம்பத் தகவல்கள் கிடைத்துள்ளதாக ஜக்காரியா தெரிவித்தார்.

மலேசிய ஊழல் தடுப்பு ஆணையத்துடன் (MACC) இணைந்து, தொடர்புடைய அனைவரையும் கண்டறிந்து வழக்கை வேரோடு களைய சரியான நேரத்திற்காகக் காத்திருப்பதாக அவர் கூறினார்.

"உண்மையில், சம்பவம் நடந்த முதல் நாளிலேயே சம்பந்தப்பட்ட அதிகாரிகளை நாங்கள் அடையாளம் கண்டோம். ஆனால் நான் வேறு அணுகுமுறையை எடுத்தேன். உடனே தடுத்திருந்தால், அனைவரையும் பிடிக்க முடியாமல் போயிருக்கும்.

"அதனால்தான் சூத்திரதாரிகள் யார் என்பதற்கான ஆதாரங்களைச் சேகரிக்கும் வரை அதைத் தொடர அனுமதித்தோம். நடந்தது யாருக்கும் தெரியாமல் போய்விட்டது என்று நினைக்க வேண்டாம்," என்றார்.

நடவடிக்கை எடுக்கப்படுவதற்கு முன் எந்தவிதமான தவறான நடத்தையையும் நிறுத்துமாறு அவர் பணியாளர்களை நினைவூட்டினார்.

அதிகார துஷ்பிரயோகத்தைத் தடுக்க துறை சார்ந்த ஒவ்வொரு பரிவர்த்தனையும் நெருக்கமாகக் கண்காணிக்கப்படும் என்றார்.

"இந்தச் சம்பவங்கள் மற்ற அதிகாரிகளுக்குப் பாடமாக அமைய வேண்டும். தவறு செய்பவர்கள் நடவடிக்கைக்கு முன் நிறுத்திக்கொள்ளுங்கள். என்னிடம் தகவல் உள்ளது," என்றார்.

கடந்த செவ்வாய்க்கிழமை, MyIMMs அமைப்பை ஊடுருவ சதி செய்ததாகக் கூறி மேலும் ஐந்து குடிநுழைவு அதிகாரிகள் MACC-யால் கைது செய்யப்பட்டனர்.

'ஆப்ஸ் கிராக்' நடவடிக்கை மூலம் கும்பலால் அங்கீகரிக்கப்பட்டதாகக் கண்டறியப்பட்ட PLKS ரத்து செய்யப்படும் என்று ஜக்காரியா முன்னர் கூறியிருந்தார். — பெர்னாமா