பியூஃபோர்ட்டில் மூன்று போலிஸ்காரர்கள் மின்சாரம் தாக்கி பலி

பியூஃபோர்ட் – சபா, பியூஃபோர்ட்டின் காம்போங் வெஸ்டன், ஜாலான் வெஸ்டன் பகுதியில் மின்சாரம் தாக்கியதால் மூன்று போலிஸ்காரர்கள் உயிரிழந்தனர்.

பெர்னாமா செய்தி நிறுவனத்தின் தகவலின்படி, சம்பவம் தொடர்பான பல காணொளிகள் சமூக ஊடகங்களில் விரைவாக பரவின. அதில் மூன்று ஆடவர்கள் சாலையில் கிடப்பதும், அருகில் மக்கள் கூடி நிற்பதும் காணப்பட்டது.

சபா தீயணைப்பு மற்றும் மீட்புத் துறையின் நடவடிக்கை மையம் வெளியிட்ட அறிக்கையில், மாலை 5.56 மணிக்கு அவசர அழைப்பு கிடைத்தது எனக் கூறப்பட்டது.

அதைத் தொடர்ந்து, நிலையத்திலிருந்து சுமார் 28 கிலோமீட்டர் தொலைவில் உள்ள சம்பவ இடத்திற்கு பியூஃபோர்ட் தீயணைப்பு நிலையத்திலிருந்து ஏழு தீயணைப்பு வீரர்கள் அணி அனுப்பப்பட்டது.

"ஜாலான் வெஸ்டன், காம்போங் வெஸ்டனில் மூன்று பேர் மின்சாரம் தாக்கி பாதிக்கப்பட்டதாக ஆரம்ப அறிக்கை தெரிவித்தது. அதன் பின்னர் மீட்பு நடவடிக்கைக்காக தீயணைப்பு அணி அனுப்பப்பட்டது," என அறிக்கை கூறியது.

நடவடிக்கைத் தளபதி இர்வான் அப்துல் தலைமையில் அணி பணியாற்றியது; போலிஸ் மற்றும் சபா எலெக்ட்ரிசிட்டி பணியாளர்கள் உதவினர்.

மறுபுறம், பெரிதா ஹரியான் செய்தியின்படி, சபா போலிஸ் ஆணையர் ஜாவ்தே டிக்குன், ஆரம்ப விசாரணையில் சம்பவம் நடந்தபோது ஒரு போலிஸ்காரர் தேங்காய்களைப் பறிக்க முயன்றது தெரியவந்தது என்றார்.

"அவர்களில் ஒருவர் இரும்புக் கம்பியைப் பயன்படுத்தி தேங்காயைக் குத்தி கீழே விழச் செய்ய முயன்றதாக நம்பப்படுகிறது. ஆனால் அவர் சமநிலையை இழந்து, கம்பி மின்சாரம் பாய்ந்த கேபிளில் உரசியது.

"மற்ற இரு போலிஸ்காரர்கள் தம் சகாவுக்கு உதவச் சென்றபோது, அவர்களையும் மின்சாரம் தாக்கியது," என அவர் கூறியதாக மேற்கோள் காட்டப்பட்டது.

உயிரிழந்தவர்கள் சியூ டெக் சியோங் (40), நூர் ஹாபிஸ் இப்ராஹிம் (29) மற்றும் ரைமி இஸ்மருபீ (26) என அவர் அடையாளப்படுத்தினார்.

மூவரின் உடல்கள் பிரேத பரிசோதனைக்காக பியூஃபோர்ட் மருத்துவமனைக்கு அனுப்பப்பட்டு, பின்னர் உறவினர்களிடம் ஒப்படைக்கப்படும் என ஜாவ்தே கூறினார்.