இரும்புக் கம்பு மின்கம்பியில் உரசியதில் மூன்று போலிஸார் பலி

தேங்காய் பறிக்கப் பயன்படுத்திய நீளமான இரும்புக் கம்பு சமநிலை இழந்து மேலிருந்த மின்கம்பியில் உரசியதில், மூன்று போலிஸ் அதிகாரிகள் மின்சாரம் தாக்கி உயிரிழந்துள்ளனர்.

இச்சம்பவம் மாலை 5.50 மணியளவில் நிகழ்ந்தது என பெரிட்டா ஹரியான் செய்தி வெளியிட்டுள்ளது.

அந்தச் செய்தியின்படி, நீளமான இரும்புக் கம்பு மின்கம்பியில் உரசியபோது ஒரு அதிகாரி முதலில் மின்சாரத் தாக்குதலுக்கு உள்ளானார். அருகில் இருந்த மற்ற இரண்டு அதிகாரிகள் அவரைக் காப்பாற்ற முயன்றபோது அவர்களும் மின்சாரத் தாக்குதலுக்கு உள்ளாகி, மூவரும் உயிரிழந்ததாக உறுதிப்படுத்தப்பட்டது.

உயிரிழந்தவர்கள் சியூ டெக் சியோங் (40), முகமட் நூர் ஹபிஸ் இப்ராஹிம் (29) மற்றும் முகம்மது ரைமி இஸ்மருபி (26) என அடையாளம் காணப்பட்டுள்ளனர்.

சபா போலிஸ் ஆணையர் ஜாவ்தே டிக்குன் கூறுகையில், சம்பவத்திற்கு முன் மூன்று அதிகாரிகளும் தேங்காய் பறிக்கச் சென்றிருந்தது தொடக்க விசாரணையில் தெரியவந்துள்ளது.

"நீளமான இரும்புக் கம்பைப் பயன்படுத்தியபோது, அது சமநிலை இழந்து மின்கம்பியில் உரசியிருக்கலாம் என நம்பப்படுகிறது.

"மற்ற இரண்டு அதிகாரிகள் தம் சகாவுக்கு உதவ முயன்றபோது அவர்களும் மின்சாரத் தாக்குதலுக்கு உள்ளானார்கள்," என அவர் கூறியதாக அச்செய்தி மேற்கோள் காட்டியுள்ளது.

சம்பவத்தின் உண்மையான காரணத்தைக் கண்டறிய போலிஸார் விசாரணைக் கோப்பைத் தொடங்கியுள்ளனர் என அவர் தெரிவித்தார்.

உடல்கள் உறவினர்களிடம் ஒப்படைக்கப்படும் முன் பிரேத பரிசோதனை நடத்தப்படும்.