ஹோர்முஸ் ஜலசந்தியைத் திறக்க வேண்டும், இல்லையேல் 'கடும் தாக்குதல்' – ஈரானுக்கு டிரம்ப் எச்சரிக்கை

ஹோர்முஸ் ஜலசந்தியை ஈரான் மீண்டும் திறக்க வேண்டும், இல்லையேல் "மிகக் கடுமையான தாக்குதலை" எதிர்கொள்ள நேரிடும் என அமெரிக்க அதிபர் டொனால்ட் டிரம்ப் எச்சரித்துள்ளார்.

"ஜலசந்தி மிக விரைவில் திறக்கப்படும், அல்லது அவர்கள் மிகக் கடுமையாகத் தாக்கப்படுவார்கள் – அதன் பிறகு ஜலசந்தி திறக்கப்படும்," என்று கலிபோர்னியா விஜயத்தின்போது அவர் கூறினார். (மொழிபெயர்ப்பு)

பேச்சுவார்த்தைகள் தொடர்வதாக டிரம்ப் கூறினார். அமெரிக்கா, ஈரான் மற்றும் ஓமான் ஆகியவை ஜலசந்தியை மீண்டும் திறப்பதற்கான இடைக்கால ஒப்பந்தத்தை நெருங்கிவிட்டதாகவும், அதை புதன்கிழமை அறிவிக்க வாஷிங்டன் எதிர்பார்ப்பதாகவும் Axios செய்தி வெளியிட்டது.

உலகின் எண்ணெய் மற்றும் எரிவாயு விநியோகத்திற்கான முக்கியப் பாதையான ஹோர்முஸ் ஜலசந்தி, மீண்டும் மீண்டும் மோதல்கள் வெடிப்பதற்குக் காரணமாக அமைந்துள்ளது.

"மிகச் சிறந்த கலந்துரையாடல்கள் நடைபெறுகின்றன," என்ற அவர், பிப்ரவரி 28ஆம் தேதி அமெரிக்காவும் இஸ்ரேலும் ஈரான் மீது தாக்குதல் தொடுத்ததில் தொடங்கிய மோதலை முடிவுக்குக் கொண்டுவர ஈரான் ஆர்வம் காட்டுவதாகக் கூறினார்.

"செயல் மட்டுமே முக்கியம். அவர்கள் ஒப்பந்தம் செய்ய விரும்புகிறார்கள். என்ன நடக்கிறது என்று பார்ப்போம்," என்றார். "எனக்கு நிறைய நேரம் இருக்கிறது," எனவும் அவர் சேர்த்துக்கொண்டார்.

பெயர் குறிப்பிடப்படாத பிராந்திய அதிகாரிகளையும் ஓர் அமெரிக்க அதிகாரியையும் மேற்கோள் காட்டி Axios கூறியதாவது: ஈரானுக்கும் ஓமானுக்கும் இடையேயான ஜலசந்தியில் 60 நாள் பாதுகாப்பான கடத்தல் ஏற்பாடே பரிசீலனையில் உள்ளது.

சுங்கக் கட்டணம் இல்லாத இந்த ஒப்பந்தம் பின்னர் நீட்டிக்கப்படலாம் என்று அச்செய்தி தெரிவித்தது.

வளைகுடாவை நோக்கிச் செல்லும் அனைத்துக் கப்பல்களும் வடக்குப் பாதையையும், வெளியே செல்பவை ஓமானின் கடல் எல்லை வழியாகச் செல்லும் தெற்குப் பாதையையும் பயன்படுத்தும்.