அமெரிக்காவில் வெடிமருந்து இருப்பு 'மிக அதிகம்' – டிரம்ப்; தகவல் கசிவாளர்களுக்கு சிறைத்தண்டனை எச்சரிக்கை

வாஷிங்டன் – அமெரிக்க அதிபர் டொனால்ட் டிரம்ப், தமது நாட்டில் வெடிமருந்து இருப்பு மிக அதிக அளவில் உள்ளது என வியாழக்கிழமை உறுதிப்படுத்தினார். அதற்கு மாறாகக் கூறுபவர்களுக்கு சிறைத்தண்டனை விதிக்கப்படும் என்றும் அவர் எச்சரித்தார். ஈரானுடனான போர் தொடர்பான அவரது விரக்தி அதிகரித்து வரும் நிலையில் இந்த அறிவிப்பு வெளியானது.

ஆயுத இருப்பு குறைந்து வருகிறது எனும் குற்றச்சாட்டு தொடர்பான ஊடக செய்திகளை, குடியரசுக் கட்சித் தலைவரான அவர் தமது Truth Social தளத்தில் கண்டித்தார்.

அமெரிக்காவில் குறிப்பிட்ட வகைகளில் மிகப் பெரிய அளவில் வெடிமருந்து உள்ளது என்று அவர் கூறினார்; எனினும் விவரங்களை அவர் தெரிவிக்கவில்லை.

"மேலும், பெரும் அளவு வெடிமருந்து தயாரிக்கப்பட்டு, தேவைக்கேற்ப அமெரிக்காவுக்கு அனுப்பப்படுகிறது. பாதுகாப்பு நிறுவனங்கள் நமது நாட்டின் வரலாற்றில் அதிக எண்ணிக்கையிலான ஆலைகளையும் தொழிற்சாலைகளையும் கட்டி வருகின்றன," என்றார்.

கேம்ப் டேவிட் அமைச்சரவைக் கூட்டம்

கடந்த வெள்ளிக்கிழமை கேம்ப் டேவிட் அதிபர் விடுமுறை இல்லத்தில் நடந்த அமைச்சரவைக் கூட்டத்தில், வெடிமருந்து பற்றாக்குறை குறித்து அமெரிக்க பாதுகாப்புச் செயலர் பீட் ஹெக்செத்திடம் டிரம்ப் விளக்கம் கோரியதாக The Washington Post செய்தி வெளியிட்டது.

உரையாடல் பற்றி அறிந்த இரு தகவல் ஆதாரங்களை மேற்கோள் காட்டிய அந்தச் செய்தியில், வெடிமருந்து பற்றாக்குறைப் பிரச்சினை ஏற்கெனவே தீர்க்கப்பட்டுவிட்டதாக தாம் நினைத்திருந்தேன் என ஹெக்செத்திடம் டிரம்ப் கூறியதாகத் தெரிவிக்கப்பட்டது.

அந்தச் செய்தியைக் கண்டித்த டிரம்ப், நாட்டிற்குத் துரோகம் இழைப்பவர்கள் என அவர் வர்ணித்த தகவல் கசிவாளர்கள் தேடப்படுகின்றனர் என வியாழக்கிழமை எச்சரித்தார்.

"நீண்ட காலச் சிறைத்தண்டனை விதிக்கப்படும்!" என்று அவர் கூறினார்.

அமெரிக்காவின் வெடிமருந்து இருப்பின் சரியான அளவை டிரம்ப் வெளியிடவில்லை; தொடர்புடைய ஊடக செய்தி பெயர் குறிப்பிடப்படாத ஆதாரங்களை அடிப்படையாகக் கொண்டது. – AFP