ஜோகூரில் ஏழு பேர் கைது; ரிம10.68 மில்லியன் மதிப்பிலான போதை வேப் திரவம் பறிமுதல்

ஜோகூர் பாரு – கடந்த ஞாயிற்றுக்கிழமை நடத்தப்பட்ட ஐந்து தனித்தனி சோதனைகளில் ஏழு பேரைக் கைது செய்து, ரிம10.8 மில்லியன் மதிப்பிலான போதைப்பொருள் மற்றும் பிற பொருட்களை ஜோகூர் காவல்துறை பறிமுதல் செய்தது. போதைப்பொருள் கலந்த வேப் திரவத்தை நிரப்பும் மையமாக ஒரு கொண்டோமினியம் பயன்படுத்தப்பட்டது அம்பலமானது.

ஜோகூர் துணை காவல்துறைத் தலைவர், துணை ஆணையர் ஹூ சுவான் ஹுவாட் கூறுகையில், குலாய், ஜோகூர் பாரு, இஸ்கந்தார் புத்திரி மற்றும் முவார் பகுதிகளில் காலை 11 மணிக்கு நடவடிக்கை தொடங்கியது.

கைது செய்யப்பட்டவர்களில் ஐந்து உள்ளூர் ஆண்கள், ஒரு வெளிநாட்டு ஆண் மற்றும் ஒரு வெளிநாட்டுப் பெண் அடங்குவர்; அவர்களின் வயது 36 முதல் 46 வரை.

"குலாய் R&R ஓய்வுத் தளத்தில் உள்ள எரிபொருள் நிலையத்தில் நடத்தப்பட்ட முதல் சோதனையில் ஒரு உள்ளூர் ஆணும் ஒரு வெளிநாட்டுப் பெண்ணும் கைது செய்யப்பட்டனர். ஹோண்டா BR-V காரில் இருந்து 82.40 கிலோகிராம் எடையுள்ள, ரிம4.12 மில்லியன் மதிப்புள்ள மெத்தாம்பெட்டமீன் திரவம் கொண்ட 9,000 வேப் கார்ட்ரிட்ஜ்கள் கண்டெடுக்கப்பட்டன.

"இஸ்கந்தார் புத்திரி, பந்தார் மெடினியில் உள்ள ஒரு கொண்டோமினியத்தில் நடத்தப்பட்ட இரண்டாவது சோதனையில் வேப் திரவம் நிரப்பும் கிடங்கு கண்டுபிடிக்கப்பட்டது. அங்கு 127.55 லிட்டர் மெத்தாம்பெட்டமீன் திரவம், 0.41 கிலோ கொக்கெயின் இரு பொட்டலங்கள், 40 கிராம் கெட்டமின் மற்றும் திரவம் நிரப்பப் பயன்படுத்தப்பட்ட இயந்திரங்களும் கருவிகளும் பறிமுதல் செய்யப்பட்டன," என்று அவர் இன்று ஜோகூர் காவல்துறைத் தலைமையகத்தில் நடந்த செய்தியாளர் சந்திப்பில் கூறினார்.

தாமான் சுத்தேரா உத்தாமாவில் நடத்தப்பட்ட மூன்றாவது சோதனையில் ஒரு உள்ளூர் ஆண் கைது செய்யப்பட்டு, ஹெராயின், எரிமின் 5 மாத்திரைகள் மற்றும் எக்ஸ்டசி மாத்திரைகள் பறிமுதல் செய்யப்பட்டன. முத்தியாரா ரினி மற்றும் முவார் தஞ்சோங் ஆகாஸில் நடத்தப்பட்ட மேலும் இரு சோதனைகளில் கும்பலில் முக்கியப் பங்கு வகித்ததாகக் கருதப்படும் மூன்று உள்ளூர் ஆண்கள் பிடிபட்டனர்.

"முதல் சந்தேக நபர் கடத்தல் வாகன ஓட்டுநர், இரண்டாவது நபர் அவரது மனைவி, மூன்றாவது நபர் கிடங்கைப் பராமரித்தார், நான்காவது நபர் ரன்னர், ஐந்தாவது நபர் கருவிப் பொட்டலங்களைப் பெற்றார், ஆறாவது நபர் நடவடிக்கைகளுக்கு உதவினார், ஏழாவது நபர் முக்கிய சூத்திரதாரி என நம்பப்படுகிறது," என்றார்.

மொத்தம் 210.43 கிலோகிராம் போதைப்பொருள், சந்தை மதிப்பு ரிம10.68 மில்லியன்; சந்தையை எட்டியிருந்தால் 649,096 போதைக்கு அடிமையானவர்களுக்குப் பயன்பட்டிருக்கும்.

சிறுநீர் பரிசோதனையில் இரு நபர்களுக்கு மெத்தாம்பெட்டமீன் நேர்மறையாக இருந்தது; நான்கு பேருக்கு குற்றவியல் மற்றும் போதைப்பொருள் பதிவுகள் உள்ளன. அனைவரும் ஆகஸ்ட் 3 முதல் ஏழு நாட்கள் விசாரணைக் காவலில் வைக்கப்பட்டுள்ளனர்.

வழக்கு 1952 ஆபத்தான போதைப்பொருள் சட்டத்தின் பிரிவு 39B கீழ் விசாரிக்கப்படுகிறது.