சமையலறை கத்தியை விழுங்கிய நாகம்: வயிற்றைத் துளைத்த கத்தி முனை

ஜகார்த்தா – ஒரு நாகம் சமையலறைக் கத்தியை விழுங்கியதால் கத்தியின் முனை அதன் வயிற்றைத் துளைத்து வெளியே வந்த நிலையில், கடும் வேதனையில் கண்டுபிடிக்கப்பட்டது என detikjabar செய்தித் தளம் தெரிவித்தது.

இந்த அசாதாரண சம்பவம் இந்தோனேசியாவின் மத்திய ஜாவா மாநிலத்தில் உள்ள ஸ்ரோயோ கிராமத்தில் ஒரு குடியிருப்பாளரின் வீட்டில் நிகழ்ந்தது.

சிகித் என்ற குடியிருப்பாளரின் வீட்டில் பாம்பு இருப்பதாக முன்தினம் காலை புகார் கிடைத்ததை அடுத்து, Exalos Indonesia அமைப்பின் தொண்டர்கள் சென்றபோது இந்த நிலை தெரியவந்தது.

தொண்டர்கள் உள்ளூர் நேரம் காலை 9 மணியளவில் இடத்திற்கு வந்தபோது, பாம்பு ஒரு பொந்துக்குள் ஒளிந்திருந்தது.

Exalos Indonesia தொண்டர் காம்டோ கூறுகையில், ஒரு மீட்டர் நீளமுள்ள அந்த நாகம் வாலை மட்டும் வெளியே காட்டியபடி ஒளிந்திருந்ததைக் கண்டோம் என்றார்.

"இடுக்கியைப் பயன்படுத்தி வெளியே இழுக்கும்போது, ஏதோ ஒரு பொருள் சிக்கியிருந்ததால் பாம்பை இழுப்பது கடினமாக இருந்தது. வெளியே எடுத்த பிறகு, ஒரு கூர்மையான பொருள் — அது ஒரு சமையலறைக் கத்தி — பாம்பின் வயிற்றைத் துளைத்திருப்பதைக் கண்டு அதிர்ச்சியடைந்தோம்," என்று அவர் கூறினார் (மலாய் மொழியிலிருந்து மொழிபெயர்க்கப்பட்டது).

அந்தக் கத்தி வீட்டு உரிமையாளருக்குச் சொந்தமானது என உறுதிப்படுத்தப்பட்டது; அது சில நாள்களுக்கு முன்பே காணாமல் போயிருந்தது.

கத்தியின் முனை மேல்நோக்கி இருந்ததால், பாம்பு முதலில் கத்தியின் பிடிப் பகுதியை விழுங்கியிருக்கலாம் என நம்பப்படுகிறது.

கத்தி வெளியே எடுக்கப்பட்ட போதிலும், கடுமையான காயங்களால் மேலும் வேதனைப்படுவதைத் தவிர்க்க அந்த நாகம் கொல்லப்பட வேண்டியிருந்தது. – ஏஜென்சி