தஞ்சோங் மாலிமில் முதல் தனியார் மருத்துவமனை: UPSI பரிசீலனை

தஞ்சோங் மாலிம்: சுல்தான் இட்ரிஸ் கல்வி பல்கலைக்கழகம் (UPSI), தனது சர்வதேச மாணவர்கள் மற்றும் ஊழியர்களின் அதிகரித்து வரும் சுகாதாரத் தேவைகளை நிறைவு செய்யும் நோக்கில் இங்கு முதல் தனியார் மருத்துவமனையைத் திறக்க திட்டமிட்டுள்ளது.

UPSI துணைவேந்தர் பேராசிரியர் டத்தோ டாக்டர் Md. Amin Md. Taff, இது தற்போதைய வளர்ச்சி மற்றும் சமூகத்தின் தேவைகளுக்கு ஏற்ப ஆதரவு வசதிகளைத் தயார்படுத்தும் பல்கலைக்கழகத்தின் மூலோபாய திட்டமிடலின் ஒரு பகுதி என்று கூறினார்.

"இந்த நோக்கத்தை நிறைவேற்ற பொருத்தமான வணிக மாதிரியை ஆராய்வதுடன், தனியார் மருத்துவமனைகளுடன் ஒத்துழைப்பு வாய்ப்பையும் UPSI தற்போது மதிப்பிட்டு வருகிறது.

"தஞ்சோங் மாலிமில் அல்லது UPSI-க்குச் சொந்தமான நிலத்தில் இயங்குவதற்கு ஏதேனும் ஒரு தனியார் மருத்துவமனை அல்லது தனியார் நிபுணத்துவ மருத்துவமனையைப் பெற முயற்சிக்கிறோம். வணிக மாதிரியின் கருத்தாக்கம் எவ்வாறு இருக்கும் என்பதை ஆராய்கிறோம்," என்று அவர் இன்று UPSI சுல்தான் அப்துல் ஜலில் ஷா வளாகத்தில் தெரிவித்தார்.

UPSI மற்றும் தஞ்சோங் மாலிம் கல்வி மையமாகவும் தரமான ஆதரவு வசதிகளைத் தேவைப்படும் சமூகமாகவும் தொடர்ந்து வளர்ந்து வருவதால், இந்தத் திட்டம் எதிர்கால தேவைகளுக்கு ஏற்றது என்றார்.

ஓய்வு பெற்ற பல்கலைக்கழக உறுப்பினர்கள் வளாகத்துடன் தொடர்பில் இருக்க வகை செய்யும் ஓய்வு வசதிகளை தஞ்சோங் மாலிமில் உருவாக்கும் நீண்டகால அபிலாஷையும் UPSI-க்கு உள்ளது என்று அவர் கூறினார்.

"UPSI ஓய்வூதியர் சமூகத்தை அங்கு உருவாக்கும் முயற்சியின் ஒரு பகுதியாக ஓய்வு விடுதி (ரிசார்ட்) உருவாக்கும் முன்மொழிவும் இதில் அடங்கும்," என்றார். – UTUSAN

மேற்கோள்கள் மலாய் மொழியிலிருந்து மொழிபெயர்க்கப்பட்டவை.