வான்ட்ரிஸ் எனர்ஜிக்கு புதிய ஒப்பந்தங்கள்; ஆர்டர் மதிப்பு ரிM6 பில்லியனைத் தாண்டியது

பெட்டாலிங் ஜெயா – முன்னர் சபுரா எனர்ஜி (Sapura Energy) என அறியப்பட்ட வான்ட்ரிஸ் எனர்ஜி பெர்ஹாட், மலேசியாவில் போக்குவரத்து மற்றும் நிறுவுதல் (T&I) சேவைகள் மற்றும் டெண்டர் ஆதரவுடன் கூடிய துளையிடும் ரிக் (TADR) சேவைகளுக்கான புதிய ஒப்பந்தங்களைப் பெற்று, எண்ணெய் மற்றும் எரிவாயுத் துறையில் தனது நிலையை மேலும் வலுப்படுத்தியுள்ளது.

இந்த ஒப்பந்தங்கள் நிறுவனத்தின் ஆர்டர் புத்தக மதிப்பை ரிM6 பில்லியனுக்கும் மேலாக உயர்த்தியுள்ளதாக நிறுவனம் தெரிவித்தது. கடல்சார் திட்டங்களை நிறைவேற்றும் அதன் திறனில் வாடிக்கையாளர்களின் தொடர் நம்பிக்கையை இது பிரதிபலிப்பதாகவும் கூறியது.

பொறியியல் மற்றும் கட்டுமானம்

பொறியியல் மற்றும் கட்டுமானப் (E&C) பிரிவில், முழு உரிமையிலான துணை நிறுவனமான VTEB Offshore Sdn. Bhd. (முன்பு Sapura Offshore Sdn. Bhd.), தற்போதுள்ள ஒப்பந்தத்தின் கீழ் கடல்சார் வசதிகளுக்கு T&I சேவைகளை வழங்க பெட்ரோனாஸ் கரிகாலி நிறுவனத்திடமிருந்து பணி ஆணையைப் பெற்றுள்ளது.

அப்பணிகள் 2026ஆம் ஆண்டின் இரண்டாம் காலாண்டில் தொடங்கியுள்ளன; 2027 மூன்றாம் காலாண்டில் நிறைவடையும் என எதிர்பார்க்கப்படுகிறது.

துளையிடல் பிரிவு

நிறுவனத்தின் துளையிடல் வணிகப் பிரிவு, பெட்ரோனாஸ் கரிகாலியிடமிருந்து ஒப்படைப்பு அறிவிப்பையும் (Notice of Assignment), Vestigo Petroleum Sdn. Bhd.-இடமிருந்து TADR சேவைகளுக்கான புதிய ஒப்பந்தத்தையும் பெற்றுள்ளது.

இவ்வொப்பந்தங்கள் 2026 மூன்றாம் காலாண்டு முதல் படிப்படியாகத் தொடங்கும் என எதிர்பார்க்கப்படுகிறது.

மறுசீரமைப்பு நடவடிக்கை நிறைவடைந்த பின்னர், தெளிவான மூலோபாய திசை மற்றும் வலுவான செயல்பாட்டு அடித்தளத்துடன் நிறுவனம் புதிய நிதியாண்டில் நுழைவதாக வான்ட்ரிஸ் எனர்ஜி குழும தலைமை நிர்வாக அதிகாரி முகம்மட் ஸாம்ரி ஜூசோ கூறினார்.

“ஒழுக்கமான, கவனம் செலுத்திய செயலாக்கத்தின் வழியாக வணிகத்தை மீளக் கட்டியெழுப்புவதில் அடைந்த தொடர் முன்னேற்றத்தை இந்த ஒப்பந்தங்கள் பிரதிபலிக்கின்றன,” என அவர் அறிக்கையில் தெரிவித்தார். (மலாய் மொழியிலிருந்து மொழிபெயர்க்கப்பட்டது.)

நிரூபிக்கப்பட்ட செயல்திறன் பதிவு, வலுவான வாடிக்கையாளர் உறவுகள் மற்றும் உறுதியான செயலாக்கத் திறனுடன் முக்கியச் சந்தைகளில் நிலையை வலுப்படுத்துவதே முன்னுரிமை என அவர் மேலும் கூறினார்.