நெகிரி செம்பிலான் அரசில் PH இணைவதாகக் கூறப்படுவதை உம்னோ உறுப்பினர் மறுப்பு

நெகிரி செம்பிலான் மாநில அரசில் பாக்காத்தான் ஹரப்பான் (PH) இணைவது குறித்து எந்தப் பேச்சுவார்த்தையும் நடைபெறவில்லை என உம்னோ சட்டமன்ற உறுப்பினர் அஸ்னா மறுத்துள்ளார்.

"இதை நான் வலியுறுத்த விரும்புகிறேன்: அது குறித்து எந்தக் கலந்துரையாடலும் நடக்கவில்லை. முற்றுப்புள்ளி," என்று அவர் தமது முகநூல் பதிவில் தெரிவித்தார்.

மந்திரி பெசார் இஸ்மாயிலின் மாநில நிறைவேற்றுக் குழு தொடர்பான பேச்சுவார்த்தைகள் அரசியல் நிலைத்தன்மையை உறுதி செய்ய நடந்து வருவதாக ஆதாரங்களை மேற்கோள் காட்டி MalaysiaGazette வெளியிட்ட செய்தியைத் தொடர்ந்து அவரது மறுப்பு வந்துள்ளது.

தேர்தல் ஒப்பந்தத்தின் கீழ் போட்டியிட்ட பாரிசான் நேசனல் (BN) 18 இடங்களையும், பெரிக்காத்தான் நேசனல் (PN) ஏழு இடங்களையும் வென்ற பின்னர் இஸ்மாயில் மந்திரி பெசாராகப் பதவியேற்றார். எளிய பெரும்பான்மைக்கு 19 இடங்கள் தேவை.

தலையீட்டுக் குற்றச்சாட்டு நிராகரிப்பு

இஸ்மாயிலின் நியமனத்துக்கு வெளித் தலையீடு காரணம் என வவாசான் தலைவர் ராயிஸ் யாத்திம் கூறியதையும் அஸ்னா நிராகரித்தார். மாநிலத் தேர்தல் வெற்றிக்குப் பிறகு BN தலைவர் அஹ்மத் ஜாஹிட் ஹமிடி, யாங் டிபெர்துவான் பெசார் துவாங்கு முஹ்ரிஸ் துவாங்கு முனாவிரைச் சந்தித்ததை இது குறிப்பதாகத் தெரிகிறது.

ஜாஹிட் நெகிரி செம்பிலானின் சட்டங்களையும் மரபுகளையும் பின்பற்றியுள்ளார் என்றும், ராயிஸின் குற்றச்சாட்டுகள் ஆதாரமற்றவை என்றும் இரு முறை சட்டமன்ற உறுப்பினரான அவர் கூறினார்.

"வேட்பாளர் பட்டியல் யாங் டிபெர்துவான் பெசாரிடம் சமர்ப்பிக்கப்பட்ட பின், மந்திரி பெசாரைத் தேர்ந்தெடுக்கும் முடிவை BN தலைவர் அரச பெருந்தகையின் விருப்பத்திற்கே விட்டுவிட்டார்.

"மந்திரி பெசார் நியமிக்கப்பட்டு பணியையும் தொடங்கிவிட்டார். அவரது தலைமை இனி கேள்விக்குள்ளாக்கப்படக் கூடாது என நம்புகிறேன். பணியாற்ற இடம் கொடுங்கள்.

"துவாங்கு முஹ்ரிஸ் தமது முடிவை அறிவித்துவிட்டார். மக்கள் பிரதிநிதிகளாக நாம் அதற்கு இணங்க வேண்டும். தனிப்பட்ட அல்லது அரசியல் நலன்களைவிட மக்கள் நலனுக்கே முன்னுரிமை அளியுங்கள்," என்றார் அஸ்னா.

மாநில உம்னோ தலைவர் ஜலாலுடின் அலியாஸ், ஜோஹோல் சட்டமன்ற உறுப்பினர் சைஃபுல் யாசான் சுலைமான் ஆகியோருடன் அஸ்னாவும் மந்திரி பெசார் பதவிக்கான முன்னணி பெயர்களில் ஒருவராகப் பேசப்பட்டார்.