இரவு நேரத்தில் பள்ளிவாசல் ஒலிபெருக்கியில் குரான் ஓதிய பெண்ணுக்கு அறிவுரை

ஜகார்த்தா – இரவு நேரத்தில் ஒரு பள்ளிவாசலின் ஒலிவாங்கியைப் பயன்படுத்தி குரான் ஓதியதற்காக ஒரு பெண்ணுக்கு அறிவுரை வழங்கப்படும் காணொளி இந்தோனேசியாவில் பரவலாகப் பகிரப்பட்டு வருகிறது.

இச்சம்பவம் சமீபத்தில் கிழக்கு ஜாவா மாநிலத்தின் மாடியூனில் நிகழ்ந்ததாக நம்பப்படுகிறது.

@kajimbonang எனும் கணக்கின் வழி டிக்டோக் தளத்தில் பதிவேற்றப்பட்ட காணொளியில், பள்ளிவாசலின் ஒலிவாங்கி மற்றும் ஒலிபெருக்கியைப் பயன்படுத்தி ஓதிக்கொண்டிருந்த பெண்ணை காணொளி எடுத்தவர் கண்டித்து அறிவுரை வழங்குவது காட்டப்படுகிறது.

இரவில் ஓதியதைத் தவிர, அவர் அப்பகுதி மக்களின் அமைதியைக் குலைத்ததாகக் கூறியும் அந்த அறிவுரை வழங்கப்பட்டது.

அந்தக் காணொளி 17 லட்சத்துக்கும் மேற்பட்ட பார்வைகளைப் பெற்று, சமூக ஊடகங்களில் பலவிதமான எதிர்வினைகளைக் கிளப்பியுள்ளது.

சம்பவத்தைப் படம்பிடித்து இணையத்தில் பகிர்ந்த செயலை சில வலைப்பயனர்கள் கேள்விக்குட்படுத்தினர்.

"பண்பு இருந்தால், நேரடியாக அறிவுரை சொன்னால் போதும். காணொளி எடுக்கத் தேவையில்லை," என்று ஒரு வலைப்பயனர் கூறினார் (மொழிபெயர்க்கப்பட்டது).

மற்றொரு பயனர், அக்கம்பக்கத்தில் ஏற்படும் பிற ஒலித் தொந்தரவுகளுடன் இதை ஒப்பிட்டார்.

"காலை வரை டங்டூட் பாடல் கேட்பது சரியா?" என்று அவர் கேட்டார்.

அப்பெண்ணின் அடையாளம் அல்லது பள்ளிவாசல் நிர்வாகத்தின் விளக்கம் குறித்த மேல் விவரங்கள் அறிக்கையில் இடம்பெறவில்லை. – ஏஜென்சி