5,000 ரோஹிங்யா அகதிகளை திருப்பி அனுப்புவது: மியன்மாருடன் பேச்சுவார்த்தை நடத்தும் விஸ்மா புத்ரா

புத்ராஜெயா – மலேசியாவில் உள்ள 5,000 ரோஹிங்யா இன அகதிகளை மியன்மாருக்குத் திருப்பி அனுப்பும் முன்மொழிவு தொடர்பாக, அரசாங்கம் விஸ்மா புத்ரா (வெளியுறவு அமைச்சு) வழியாக மியன்மார் இராணுவ ஆட்சி அரசாங்கத்துடன் பேச்சுவார்த்தை நடத்தும்.

தகவல் தொடர்பு அமைச்சர் டத்தோ ஸ்ரீ ஃபாமி ஃபாட்ஸில், எந்த முடிவும் எடுக்கப்படுவதற்கு முன், குறிப்பாக அந்த அகதிகளின் பாதுகாப்பும் நலனும் பாதிக்கப்படாமல் இருப்பதை உறுதி செய்ய, சில விவகாரங்கள் ஆராயப்பட வேண்டும் என்றார்.

"இந்த விவகாரத்தை விஸ்மா புத்ராவும் உள்துறை அமைச்சும் ஆராய்ந்து வருகின்றன; 5,000 மியன்மார் அகதிகள் அடையாளம் காணப்படுவார்கள்.

"ஆனால் பொறுப்புள்ள நாடாக மலேசியா, இந்த 5,000 மியன்மார் அகதிகள் அடக்குமுறைக்கு உள்ளாகும் அல்லது அவர்களின் உயிருக்கு அச்சுறுத்தல் ஏற்படும் நிலையில் அவர்களை திருப்பி அனுப்ப மாட்டாது.

"எனவே செயல்படுத்துவதற்கு முன், மியன்மார் இராணுவ ஆட்சி அரசாங்கத்துடனான பேச்சுவார்த்தையில் சில விவகாரங்களை நாங்கள் ஆராய்வோம்," என்று அமைச்சரவைக் கூட்டத்திற்குப் பிந்தைய வாராந்திர செய்தியாளர் சந்திப்பில் அவர் இன்று கூறினார். (மலாய் மொழியிலிருந்து மொழிபெயர்க்கப்பட்டது.)

கடந்த ஜூலை 29ஆம் தேதி, இரு நாடுகளுக்கு இடையிலான இராஜதந்திர பேச்சுவார்த்தை மற்றும் நல்லுறவின் விளைவாக, மலேசியாவில் உள்ள 5,000 ரோஹிங்யா அகதிகளை மீண்டும் ஏற்றுக்கொள்ள மியன்மார் ஒப்புக்கொண்டதாக ஊடகங்கள் செய்தி வெளியிட்டன.

பிரதமர் டத்தோ ஸ்ரீ அன்வார் இப்ராஹிம், இந்த முன்னேற்றம் இந்தப் பிரச்சினையைக் கையாள்வதில் ஒரு தொடக்க நடவடிக்கை என்றும், மலேசியாவில் பொது அமைதி தொடர்ந்து பாதுகாக்கப்படுவதை உறுதி செய்யும் என்றும் கூறியிருந்தார்.

மியன்மாருடனான மலேசியாவின் நல்லுறவின் மூலமே இந்த ஒப்பந்தம் எட்டப்பட்டது; அகதிகள் பிரச்சினையை அவர்களைத் திருப்பி அனுப்ப வேண்டும் என்ற கோரிக்கைகளால் மட்டும் தீர்க்க முடியாது என்பதை இது நிரூபிக்கிறது என்று அவர் சுட்டிக்காட்டினார்.

ஃபாமி மேலும் கூறுகையில், மியன்மார் இராணுவ ஆட்சி அரசாங்கம் ஏற்கெனவே 5,000 அகதிகளை ஏற்றுக்கொள்ள தயார் என்று தெரிவித்துள்ளது; ஆனால் திருப்பி அனுப்புதல் பொருத்தமானதா என்பதை உறுதி செய்ய நிபந்தனைகளை மலேசிய அரசாங்கம் ஆராய வேண்டும் என்றார்.

"பிரதமர் அறிவித்தபடி, மியன்மார் இராணுவ ஆட்சி இந்த 5,000 அகதிகளை ஏற்க தயாராக உள்ளது. ஆனால் நிபந்தனைகள் என்ன என்பதை ஆராய்வோம்; பொருத்தமாக இருந்தால் செயல்படுத்துவோம்.

"ஆனால் அவர்களின் உயிருக்கு அச்சுறுத்தல் இருந்தால் அனுப்ப முடியாது என்பதை பிரதமர் கவனத்தில் கொண்டுள்ளார். எனவே குறிப்பாக விஸ்மா புத்ரா சில விவகாரங்களை ஆராய்ந்து வருகிறது," என்றார்.