அரசாங்கப் பணிகள் அரசியல் சூடு காரணமாக நிற்கக் கூடாது: ஸாஹிட்

புத்ராஜெயா – அரசியல் சூடு அதிகரித்ததால் மட்டுமே அரசாங்கப் பணிகள் நின்றுவிடக் கூடாது; ஒற்றுமை அரசாங்கத்தின் நிர்வாகம் மக்கள் நலனை முன்னிலைப்படுத்தி தொடர வேண்டும்.

அரசாங்கம் அமைக்கப்பட்ட ஆணையும் புரிந்துணர்வும் மதிக்கப்படும் வரை, மாநில அளவிலான அரசியல் போட்டி கூட்டரசு மட்டத்தில் ஒற்றுமை அரசாங்கத்தின் நிலைப்புத்தன்மையைப் பாதிக்காது என்று துணைப் பிரதமர் டத்தோ ஸ்ரீ டாக்டர் அஹ்மட் ஸாஹிட் ஹமிடி தெரிவித்தார்.

"என்ன கேள்விகள் எழுந்தாலும், மாநில அளவிலான அரசியல் போட்டி கூட்டரசு மட்டத்தில் ஒற்றுமை அரசாங்கத்தின் நிலைப்புத்தன்மையை ஒருபோதும் பாதிக்காது," என்று அவர் இன்று இங்கு கிராமப்புற மற்றும் வட்டார முன்னேற்ற அமைச்சின் (KKDW) மாதாந்திரக் கூட்டத்தில் உரையாற்றும்போது கூறினார்.

ஜொகூர் மற்றும் நெகிரி செம்பிலான் மாநிலத் தேர்தல்களுக்குப் பிறகு தற்போதைய அரசியல் நிலவரம், ஒற்றுமை அரசாங்கத்தின் நிலை மற்றும் நிர்வாகத்தின் திசை குறித்து அரசுப் பணியாளர்களிடையே கேள்விகளை எழுப்பியிருக்கக்கூடும் என்றார்.

மாநில அளவிலான அரசியல் மாற்றங்கள், அரசாங்கம் செயல்படுத்தி வரும் கொள்கைகள், திட்டங்கள் மற்றும் பணிகளைப் பாதிக்குமா என்று பணியாளர்கள் எண்ணக்கூடும் என்று அவர் குறிப்பிட்டார்.

"இன்றைய ஒற்றுமை அரசாங்கம், நாடாளுமன்றம் கலைக்கப்படும் வரை நீடிக்கும் என்ற தெளிவான புரிந்துணர்வு மற்றும் ஒப்பந்தத்தின் அடிப்படையில் அமைக்கப்பட்டது.

"எனவே கலைப்பு நிகழாத வரை, கூட்டரசு அரசாங்கம் தொடர்ந்து செயல்படும், நிர்வாகம் தொடரும், மக்களுக்கான ஒவ்வொரு பொறுப்பும் வழக்கம்போல் நிறைவேற்றப்படும்," என்றார்.

அரசியல்வாதிகளும் அரசுப் பணியாளர்களும் அரசியலையும் நிர்வாகத்தையும் கலக்காமல் தொழில்முறையாக நடக்க வேண்டும் என அவர் வலியுறுத்தினார்.

"No politicking. நாங்கள் தொழில்முறை அரசியல்வாதிகளும் நிர்வாகிகளும்; அரசியலையும் நிர்வாகத்தையும் ஒரே கூடையில் ஒருபோதும் போடமாட்டோம்," என்றார்.

ஜனநாயக நாட்டில், நாட்டின் அரசியல் நிலவரம் குறித்து அரசுப் பணியாளர்கள் புரிந்துகொள்வதிலும் விளக்கம் பெறுவதிலும் தவறில்லை என்று ஸாஹிட் கூறினார்.

தேசிய அளவில் அரசியல் ஒத்துழைப்பு இருந்தும், சில மட்டங்களில் கட்சிகள் வேறுபட்ட அணுகுமுறைகளைக் கொண்டுள்ள ஆஸ்திரேலியா, ஜப்பான் போன்ற நாடுகளை அவர் உதாரணம் காட்டினார்.

ஒரு அரசாங்கத்தில் ஒத்துழைப்பு என்பது அனைத்துக் கட்சிகளும் தமது அரசியல் அடையாளத்தைக் கரைத்துக்கொள்ள வேண்டும் என்பதல்ல; அரசாங்க அமைப்பு ஒப்பந்தத்திற்கான உறுதிமொழி நிறைவேற்றப்படும் வரை அரசியல் சுயாட்சி நீடிக்கும் என்றார்.

"ஆணை வழங்கப்பட்டு அரசாங்கம் அமைக்கப்பட்ட பின், நிர்வாகப் பொறுப்பு அரசியல் வேறுபாடுகளை மீறி நிற்க வேண்டும்.

"மாநிலத்தில் நாம் கருத்து வேறுபடலாம், ஆனால் மத்திய அளவில் நிர்வாகத்தை நடத்தும்போது ஒரே மனம், ஒரே உணர்வு, ஒரே இலக்குடன் இருக்க வேண்டும்," என்றார்.